«Búkilálemdik kóshpendiler oıyndary» Olımpıadanyń balamasy bolmaq
ASTANA. QazAqparat - Qyrǵyzstanda Ystyqkól mańynda tuńǵysh Búkilálemdik kóshpendiler oıyndary ótkizilmek. Aldyn ala málimetter boıynsha, oǵan on eki eldiń sportshylary qatysady. Bul týraly búgin Qyrǵyzstan Respýblıkasy mádenıet mınıstriniń orynbasary Maqsat Shákıev málimdedi.
Onyń aıtýynsha, qazirgi ýaqytta 8 el jarysqa qatysýǵa kelisim berdi. Onyń ishinde Orta Azııa elderi, Túrkııa jáne Kavkaz elderi bar, dep habarlaıdy news-asia.ru.
«Jýyrda Ystambýlda atalǵan oıyndar boıynsha kezekti jınalys ótti. Jobanyń basty máni - ul tarıhyn saqtaýǵa úles qosý. Jarystar ár jyly ár elde ótedi jáne sol eldiń oıyn erejesi boıynsha ótkiziledi. Osylaısha árbir el ózin jáne óz dástúrin álemge pash ete alady», - deıdi Qyrǵyzstan Ulttyq oıyndardy damytý ortalyǵynyń basshysy.
«Bul jarystar Olımpıada oıyndarynyń balamasy bolmaq. Bizdiń mindetimiz ulttyq sport túrlerin álemge tanytý", - deıdi "Búkilálemdik kóshpendiler oıyndary» jobasynyń jetekshisi.
«Bizdiń oıymyz jańa brend jasaý. XX ǵasyrda FIFA, UEFA, NHL, WBC syndy mega-brendter týdy. Jańa ǵasyrda jańa sporttyq brend - "Búkilálemdik kóshpendiler oıyndary» paıda bolady. Osy oıyndy óz elinde ótkizýge nıet bildirip jatqan elder kúnnen kúnge kóbeıýde», - deıdi «Búkilálemdik etnooıyndar» qorynyń prezıdenti. Jarystar "kok-borý", "at-chabysh", "oodarysh", "ordo", "togýz-korgool", "kýrosh" syndy ulttyq sport túrleri boıynsha ótedi. Oǵan qosa, qatysýshy elderdiń ulttyq oıyndary, qyz qýý, tıyn alý, sadaq atý, batyrlar saıysy, ań aýlaý oıyndarynan jeńimpazdar irikteledi.
