«Búkilálemdik glaýkoma aptalyǵy» aıasynda Qazaq kóz aýrýlary ǵylymı-zertteý ınstıtýtynda ashyq esik kúnderi ótýde
ASTANA. 14 naýryz. QazAqparat - 10-16 naýryz aralyǵynda «Búkilálemdik glaýkoma aptalyǵy» ótýde. Bul týraly QR Densaýlyq saqtaý mınıstrliginiń baspasóz qyzmetinen habarlandy.
Eske sala ketsek, glaýkoma aýrýy - oftalmologııa salasy úshin eń ózekti problemanyń biri. Málimetterge qaraǵanda, álem boıynsha atalmysh dertke shaldyqqan adamdar sany 66,8 mln.-nan 105 mln.-ǵa deıin jetedi. Sonymen qatar, adamdy kóz janarynan aıyryp, zaǵıptyqqa uryndyratyn sebepterdiń ishinde glaýkoma 2-3 orynǵa turaqtap, ekonomıkalyq damyǵan elderde barlyq zaǵıp jandardyń 14-15%-yn quraıdy eken.
«Glaýkoma otandyq oftalmologııa úshin de basym baǵyttardyń biri bop qalýda. Qazaqstanda glaýkomany skrınıngteý jumysy 2011 jyldyń sáýir aıynda bastaldy. Búgingi tańda respýblıka boıynsha 3 740 384 adam glaýkomaǵa skrınıngtik tekserýden ótkizildi. Al «Salamatty Qazaqstan» memlekettik baǵdarlamasyn iske asyrý sheńberinde oblys ortalyqtarynda, Astana jáne Almaty qalalarynda mamandandyrylǵan glaýkoma kabınetterin ashý josparlanǵan», - delingen baspasóz baıanynda.
Toqtala ketetin jaıt, Búkilálemdik glaýkoma kúni sheńberinde Densaýlyq saqtaý mınıstrliginiń Qazaq kóz aýrýlary ǵylymı-zertteý ınstıtýty mamandary ashyq esik kúnderin, naýqastarǵa arnalǵan «Glaýkoma mektebi» jáne dárigerlerge arnalǵan «Glaýkomany dıagnostıkalaý jáne emdeýdiń qazirgi zamanǵy ádisteri» taqyrybynda oqytý semınarlaryn ótkizýde.
