Búkilálemdik gemofılııa kúnine oraı ashyq esik kúnderi jarııalandy - Densaýlyq saqtaý mınıstrligi
ASTANA. 12 sáýir. QazAqparat - Búkilálemdik gemofılııa kúnine oraı QR Densaýlyq saqtaý mınıstrliginiń bastamasymen naýqastar úshin ashyq esik kúnderi jarııalandy, dep habarlady vedomstvonyń baspasóz qyzmetinen.
«Gematolog dárigerlerdiń keńes berý kabınetteri ornalasqan oblys ortalyqtarynyń barlyǵynda tegin keńester beriledi. Respýblıkalyq deńgeıde Astanada ornalasqan Jedel medıtsınalyq kómek respýblıkalyq ortalyǵynda barlyq kelýshilerge birqatar medıtsınalyq qyzmetter: gematologtar men ortopedterdiń keńesteri, qannyń uıý faktorlary deńgeıi men ıngıbıtordy anyqtaý, dárilik preparattardy ózinshe engizýge oqytý, býyndarǵa magnıtti rezonansty tomografııa jasaý jáne t.b. qyzmetter kórsetiledi», - delingen baspasóz habarlamasynda.
Vedomstvonyń aqparatyna sáıkes, qazirgi ýaqytta Qazaqstanda gemofılııamen syrqattanatyn 771 naýqas dárigerlerdiń baqylaýynda. «Salamatty Qazaqstan» memlekettik baǵdarlamasy aıaynda naýqastardyń barlyǵy qannyń uıý faktorlarymen qamtamasyz etilgen. Gemofılııamen aýyratyn naýqastar qaýymdastyǵymen birlese atqarylǵan jumystar nátıjesinde elimizde naýqastarǵa kórsetiletin medıtsınalyq járdem sapasy artýda. Qannyń uıý faktorlarymen qamtamasyz etý deńgeıi TMD elderimen salystyrǵanda áldeqaıda joǵary.
Qazaqstan - naýqastardyń qannyń uıý faktorlaryna, qan aǵymyna profılaktıka jasaý jáne emdeýge ketetin shyǵyndardy memleket kóteretin álemdegi jalǵyz el. Tipti, gemofılııanyń eń qaterli - ıngıbıtorlyq túrine shaldyqqan naýqastar da tıisti faktorlarmen qamtamasyz etiledi. Degenmen, alda áli kóptegen jumystar atqarylýy tıis. Olar: aýrý túri jáne terapııa erejeleri týraly naýqastardy aqparattandyrý deńgeıin arttyrý, naýqas balalardy úıde durys qaraýǵa úıretý, qannyń uıý faktorlaryna jalpylama skrınıng, gemofılııa geni barlarǵa genetıkalyq saraptama júrgizý jáne t.b. sharalar.
Aıta keteıik, jyl saıyn 17 sáýirde álemniń kóptegen elderi Dúnıejúzilik gemofılııa federatsııasynyń aktsııasyna qatysyp, Búkilálemdik gemofılııa kúnin atap ótedi. Atalǵan is-shara maqsaty - osy aýyr dert problemalaryna qoǵam nazaryn aýdarý.
