Búkilálemdik Ekonomıkalyq forýmnyń Jas kóshbasshylar qaýymdastyǵy Astanada óz ortalyǵyn ashty

Ortalyqtyń resmı tusaýy Nazarbaev Ýnıversıtetinde kesildi.

«Bul jobaǵa 20 men 30 jas aralyǵyndaǵy kez kelgen mamandyq ıeleri, óz qabilet-qarymyn qoǵam múddesine saı jetildirýge nıetti jastar qatysa alady. Olardyń boıyndaǵy adamgershilik pen ıntellektýaldyq prıntsıpteri joǵary deńgeıde bolýy tıis. Kásipkerlik tájirıbesi bar, iri jobaǵa bastamashy bolyp, ony tıimdi túrde júzege asyrǵan, qoǵam ómirine belsene aralasyp, onyń damýyna aıtarlyqtaı úles qosqan jastarǵa basymdyq beriledi», - deıdi uıymdastyrýshylar.

Global Shapers Community qaýymdastyǵynyń músheleri bir-birimen tyǵyz qarym-qatynas jasap, tájirıbe almasyp otyrýy úshin álemniń iri qalalarynda qyzmet Ortalyqtaryn uıymdastyryp otyrady. Bir-birimen pikir almasa otyryp, Qaýymdastyq músheleri jastardyń jumysqa ornalasý, zańnamalarǵa ózgerister engizý, ekologııany jaqsartý syndy máselelerdi sheshýge jol ashatyn kásipkerlik jańashyl ıdeıalaryn usyna alady.

Astanada qurylyp otyrǵan osy Ortalyqtyń kýratory bolyp QR Prezıdentiniń «Bolashaq» halyqaralyq stıpendııasy stıpendıattary Qaýymdastyǵynyń múshesi ári «Halyqaralyq baǵdarlamalar ortalyǵy» AQ prezıdenti Saıasat Nurbek saılandy.

Aıta keteıik, Global Shapers Ortalyqtary Reseı, Ýkraına, Ázirbaıjan, Grýzııa, Armenııa, Qyrǵyzstan sııaqty elderde de bar.