Búkilálemdik boks serııasynyń aqtyq synyndaǵy alǵashqy kezdesý «Astana arlandarynyń» paıdasyna sheshildi
GÝıANG. 7 mamyr. QazAqparat /Erlik Erjanuly/ - Keshe túnde Qytaıdyń Gýıang qalasynda «Astana arlandary» men «Parıj ıýnaıted» komandalary arasynda Búkilálemdik boks serııasynyń aqtyq saıystarynyń 1-kezeńi ótti.
Onda qazaqstandyqtar qarsylastaryn 3:2 esebimen utty. Alǵashqy upaıdy eń jeńil salmaqta (54 kg) judyryqtasqan Qanat Ábýtálipov ıelendi. Ol frantsýzdardyń grýzııalyq legıoneri Gıorgı Kılanovtan (49:48, 47:48, 47:48) basym tústi. Alaıda Qanattyń jeńisti joly 61 kelidegi Mereı Aqshalovqa juǵysty bolmady. 2-raýndta sol jaq qabaǵy jarylǵan astanalyq boksshy Rashıd Azzedınge (48:47, 48:47, 48:47) ese jiberdi. «Astana arlandary» jankúıerleriniń endigi úmiti 73 keli salmaqta sharshy alańǵa shyqqan Qanat Silám bolatyn. Qanat úmitti tolyq aqtady. 1-raýndtyń alǵashqy mınýtynda-aq qarsylasynyń qýatty soqqylarynan esten tanýdyń aldynda turǵan Stefan Nevasty bapkeri qutqaryp qaldy. Eger ol alańǵa oramal laqtyryp jeke-jekti toqtatpaǵanda «Parıj ıýnaıted» komandasynyń quramyndaǵy bul boksshysynyń jaǵdaıyn boljaý kórermenge asa qıynǵa túspes edi. Boks jankúıerleri Gýıang ýnıversıtetiniń 3 myń oryndyq sport kesheniniń ishin jańǵyrta qoshemet kórsetti. Alaıda bul jaǵymdy aýra qazaqstandyqtardyń ózbekstandyq legıoneri Ramjon Ahmetov pen frantsýzdardyń úmitin arqalaǵan horvatııalyq Sep Hrvojeniń (85 kg) arasyndaǵy kezdesýde óz jalǵasyn taba almady. Onda sál ǵana basymdyqpen Ramjon jeńiske jetti. Budan keıin «Astana arlandarynyń» jeńisine eshkimniń kúmáni qalmady. Degenmen asa aýyr salmaqtaǵy Rýslan Myrsataev pen Tonı Ioka (+91 kg) arasyndaǵy jekpe-jek jankúıerler oılaǵandaı bolmady. Qaptaldaǵy tóreshiler sheshimimen alańdaǵy sýdıa Tonıdiń qolyn kóterip, «Parıj ıýnaıtedtiń» esep aıyrmasyn qysqartýyna múmkindik berdi. Ázirge jalpy esep 3:2 nátıjesimen «Astana arlandarynyń» enshisinde. Endi jarystyń búgingi túnde bolatyn ekinshi jartysy qos komanda úshin de asa tartysty óterine eshkim kúmán týdyra almasy anyq. Onda bul joly Mirjan Rahymjanov pen ırlandııalyq Djon Djozef Nevın, Erjan Músápirov pen Abdelkader Shadı, Baqyt Sársekbaev pen Mıshel Tavares, Marat Moldagereev pen Abdýlkader Býhenıa, ózbekstandyq Sardor Abdýllaev pen horvatııalyq Fılıpp Hrgovıch ózara kúsh synasady.
