Búkilálemdik boks serııasy: Qansha qazaq balasy judyryqtasyp júr?

2010 jyly alǵash ret tusaýy kesilgen jobaǵa bıyl aıtarlyqtaı ózgerister endi. Búkilálemdik boks serııasynyń basshylary jarysqa qatysýǵa nıet bildirgen on alty komandany tórt topqa bóldi.

«Astana arlandary» komandasy jerebe qorytyndysy boıynsha «D» tobynda Ázerbaıjan, Ózbekstan jáne Pýerto-Rıka klýbtarymen birge óner kórsetýde. Komanda quramy negizinen qazaqtyń qaradomalaq ulandarynan jasaqtalǵan.

Aıtalyq, 49 kelide Mardan Berikbaev, Temirtas Júsipov, Jomart Erjan, 52 keli salmaqta Oljas Sáttibaev, Azamat Isaqulov, Azat Mahmetov, 56 keli salmaq dárejesinde Meıirbolat Toıtov, Nurbol Qaljanov, Nursultan Kósheǵulov, 60 keli salmaqta Erjan Músáfirov, Baqdáýlet Ibragımov, 64 keli salmaqta Samat Báshenov, Ashat Ýálıhanov, Sabyrjan Baqbergenov, 69 keli salmaq dárejesinde Aslanbek Shymbergenov, Qanaǵat Maralov, 75 keli salmaqta Meıirim Nursultanov, Amanqul Ábilhan, Erik Áljanov, Rýstam Svaev, 81 keli salmaqta Nurdáýlet Jarmanov, Arman Rysbek, 91 kelide Muhamedjan Erkin, Rahman Áljanov, al asa aýyr salmaq dárejesinde Nursultan Amanjolov, Qamshybek Qońqabaev, Nurjan Bekzatov sııaqty qazaqtyń urda-jyq azamattary bylǵary qolǵabymen talaı sharshy alańda el mereıin asyryp, atoı salyp júr.

«Astana arlandary» óner kórsetetin «D» tobyndaǵy Ózbekstan quramasynda taǵy bir qazaqtyń qarakóz ulany sharshy alań kórigin qyzdyrýǵa ázir.

Ózge eldiń týynyń astynda óner kórsetetin qandasymyz osyǵan deıin biraz bıikterdi baǵyndyryp úlgergen. Aldaǵy aıqastarda otandastaryna qarsy jekpe-jekke shyqpaq. Onyń esimi - Elnur Ábdiraıymov.

Elnur ótken jyly jazda Katar astanasy Dohada ótken bokstan álem chempıonatynda Ózbekstan quramasyna qola júlde syılap qana qoımaı, Rıo Olımpıadasynyń joldamasynda jeńip alǵan bolatyn. Búginde kórshi eldiń namysyn qorǵap júrgen ol 1994 jyly Tashkent oblysyna qarasty Bostandyq aýdanynda dúnıege kelgen. Elnur osyǵan deıin birneshe halyqaralyq týrnırlerde jeńimpaz atanǵan.

Jalpy, Ózbekstan boksshylary qandaı jarys bolmasyn qazaq boksshylarynyń eń myqty qarsylastarynyń biri ekenin bilemiz. Sondaı-aq, Búkilálemdik boks serııasy jobasyna ózbekstandyq boksshylar tuńǵysh ret qatysyp otyr. Sondyqtan, bıyl «Astana arlandary» úshin óz toptarynyń úzdigi atanyp, fınalǵa jetýi úshin aıanbaı ter tógýine týra keledi.

Al «A» tobynda Kýba, Ýkraına, Túrkııa, Qytaı elderiniń boksshylary qolǵap túıistiredi. Osy toptaǵy Qytaı quramasynda taǵy bir qazaqtyń ór minezdi ulany sol eldiń atynan judyryqtasýdy jón sanapty. Onyń esimi - Serik Tóleýtaıuly. Ol qazir 22 jasta. 2013 jyly bokstan Qytaı ulttyq quramasyna kirgen Qanat Islamnan keıingi ekinshi boksshy. Oǵan deıin Qytaı quramasynyń sapynda bolǵan Qanat Islam 2008 jyly Beıjiń Olımpıadasynda qola medal jeńip alǵanyn jaqsy bilemiz. Serik Tólentaıuly 2013 jyly Qytaı chempıony atanyp, sol eldiń atynan Almatyda ótken álem chempıonatyna da qatysyp qaıtqan bolatyn. Ókinishke qaraı, Alataý bókterinde ótken alamanda baǵy janbady. Birinshi aınalymnan asyp shaba alǵan joq-tuǵyn. Biraq, qazaqtyń qaısar ulany oǵan bola jasyp qalǵan joq, odan keıinde Qytaı quramasynda jattyǵa júrip, mıllıardtar arasynda óz salmaǵynyń úzdigi atanyp keledi. Ol bıylǵy Búkilálemdik boks serııasy aıasynda ótetin dodaǵa qaıta oralǵan Qytaıdyń China Dragons klýbynyń tolyqqandy múshesi atanyp otyr.

Esterińizge sala keteıik, WSB jobasyna Qytaı eń alǵashqy maýsymda bir jyl óner kórsetti de, belgisiz sebeptermen 2-3-4-5- maýsymda jobaǵa qatyspaǵan bolatyn. Mine, bıyl 6 maýsymda qaıtadan komanda jasaqtap, sharshy alańǵa ekinshi márte qaıta oralyp otyr.

Al ázirge «V» tobynda Meksıka, Marokko, AQSh, Ulybrıtanııa boksshylary men «S» tobydaǵy Reseı, Argentına, Polsha, Venesýela elderiniń boksshylary arasynda qazaq boksshylary bar degendi estimedik.

Mine, Búkilálemdik boks serııasy jobasynda qansha qazaq ulany judyryqtasyp júrgenin ózderińiz sanaı berińizder. Qazaq jigitteri qaıda júrse de, Alashtyń abyroıyn asyryp jatsa, bizge odan artyq maqtanysh joq. Ár qashan osyndaı ulandarymyzǵa qoldaý kórsete bileıik.

Esterińizge sala keteıik, Búkilálemdik boks serııasynyń altynshy maýsymyna arnalǵan ereje boıynsha ár toptan úzdik shyqqan eki komanda jarystyń shırek fınalyna shyǵady. Toptyq básekeniń jekpe-jekteri olımpııalyq aınalym boıynsha ótedi.

Kúnsultan Otarbaı