Búkilálemdik bank Qazaqstannyń adam kapıtalyn eseptedi
ALMATY. QazAqparat - Almatyda Búkilálemdik bank ókilderi Qazaqstannyń adam kapıtalyn eseptedi, dep habarlaıdy QazAqparat tilshisi.
Bank ókilderiniń taldaýyna sáıkes, Qazaqstannyń kórsetkishi Ortalyq Azııadaǵy kóptegen elderdiń kórsetkishinen joǵary bolǵan.
«2012-2017 jyldar aralyǵynda Qazaqstandaǵy adam kapıtaly ındeksi 0,63%-dan 0,75%-ǵa artty. Bul Qazaqstannyń bilim berý men densaýlyq saqtaý salasyna salynǵan ınvestıtsııanyń artýyna baılanysty bolǵan. Bir jaǵynan 0,75% degenimiz Qazaqstan bolashaqta tabysynyń 25 %-nan aırylady degendi bildiredi», - dedi Búkilálemdik banktiń Ortalyq Azııadaǵy adam kapıtaly boıynsha baǵdarlamasynyń jetekshisi Sýsanna Aırapetıan.
0,75 % degenimiz qazir týǵan balanyń kámelettik jasqa jetken soń eńbek ónimdiligi 75 % bolady. Al eger bala tolyq bilim alyp, densaýlyǵy óte jaqsy bolsa, onyń eńbek ónimdiligi 100 % bolar edi.
«Qazaqstanda 5 jasqa deıingi balanyń tiri qalý múmkindigi 99% shamasynda. Basqasha aıtqanda, BUU statıstıkasyna súıensek, 100 balanyń 99-y tiri qalady. Qazaqstanda 4 jastaǵy bala oqýdy bastasa, 18 jasyna taman orta bilim alyp shyǵady. Qazaqstandyq oqýshylardyń bilimi arnaıy shkala boıynsha 537 bal bolyp otyr. Álemde eń úzdik bilim berý júıesiniń baly 625 bolsa, eń tómeni 300 bal», - dedi Sýsanna Aırapetıan.
Sonymen qatar, álemde qaısy bolmasyn eldiń adamı kapıtalynyń moldyǵy eresekteriniń ómir súrý uzaqtyǵymen baǵalanady.
Qazaqstan boıynsha 15 jastaǵy balalardyń 80 %-y ǵana 60 jasqa jetedi.
Al 100 balanyń 92-siniń damýynda min joq bolsa, 8 balanyń múmkindigi shekteýli bolyp qalýy yqtımal.
«Búginde Qazaqstan bilim berý salasyna salatyn qarjysy JІÓ 3,6% -yn quraıdy. Bul asa joǵary kórsetkish emes. EYDU elderinde bul kórsetkish 3-4 ese joǵary. Qazaqstannyń ortalyǵynda beriletin bilimniń shalǵaıda beriletin biliminen aıyrmashylyǵy kóp. Qazaqstan úshin bul asa joǵary mindet. Osy kórsetkishti teńestirý. Óıtkeni mektepteriniń 4/3-i óńirlerde ornalasqan»,- dedi bank ókili.
Aıta ketý kerek, Memleket basshysy óziniń Joldaýynda 5 jyl ishinde bilim, ǵylym, densaýlyq saqtaý salalaryna barlyq kózderden jumsalatyn qarajatty ishki jalpy ónimniń 10 paıyzyna deıin jetkizý qajet degen mindet qoıǵan bolatyn.
