Búkilálemdik bank Afrıkadaǵy paıdaly qazbalardy izdeýge 1 mlrd. dollar bóledi
ASTANA. QazAqparat - Búkilálemdik bank Afrıkadaǵy paıdaly qazbalar kartasyn jasaý maqsatynda arnaıy qor quryp, oǵan 1 mlrd. AQSh dollar kóleminde qarjy quımaq, dep habarlaıdy cnews.ru.
Atalǵan qor 5 jyl boıy spýtnıkter men avıatsııalyq platformalardy qarjylandyrady. Osylaısha Afrıka qurlyǵyndaǵy geologııalyq derekter boıynsha kemshilikterdiń orny toltyrylmaq. Paıdaly qazbalar týraly aqparattyń azdyǵy Afrıkadaǵy taý-ken óndirisine ınvestıtsııa quıýda qıyndyq týdyrady. Onyń saldary kóptegen shıelenisterge ákep soqtyrady.
«Qıyn-qystaý zamanda taý-ken óndirý kompanııalary qarjyny belgisiz salaǵa salyp, kózsiz táýekelge bel býa almaıdy. Shıkizat baǵasy qazir arzandap ketti. Kompanııalar ınvestıtsııalyq bıýdjetin qysqartýda. Sondyqtan anyq tabysty qamtamasyz ete alatyn naqty aqparattyń qajettiligi kúnnen kúnge artýda», - deıdi Búkilálemdik banktiń taý-ken óndirisi bóliminiń aǵa menedjeri Paýlo de Sa.
