Búkil túrki halyqtary tiliniń, ádebı tiliniń normasy qazaq tilinde saqtalǵan - QR Mádenıet mınıstri
STANA. Tamyzdyń 26-sy. QazAqparat /Marlan Jıembaı/ - Búkil túrki halyqtary tiliniń, ádebı tiliniń normasy qazaq tilinde saqtalǵan.
Bul pikirdi búgin elordada Tilderdi qoldaný men damytýdyń 2011-2020 jyldarǵa arnalǵan memlekettik baǵdarlamasy jobasyn talqylaýǵa oraı ótkizilgen QR Prezıdenti janyndaǵy Jastar saıasaty jónindegi 7-shi keńes barysynda elimizdiń Mádenıet mınıstri Muhtar Qul-Muhammed bildirdi.
Qazaq tiline keıbir adamdardyń, ásirese jastardyń arasynda murynyn shúıirip qaraıtyndar bar ekenine qynjylys bildirgen ol, «shyntýaıtyna keletin bolsaq, jer betindegi túrki tildes halyqtardyń sany 200 mıllıonǵa jýyqtady. Túrkııanyń ózinde 70 mıllıonnan astam. Sol búkil túrki halyqtary tiliniń, ádebı tiliniń normasy Qazaqstanda, qazaq tilinde saqtalǵan. Óıtkeni bizdiń tilimiz taza túrkilik tabıǵı qabiletin, qasıetin saqtap otyr», dep basa aıtty.
Demek qazaq tilin biletin adam jer betindegi 30-ǵa jýyq túrki tilderin, ıaǵnı Sibirdegi ıakýt tilinen bastap, Altaıdaǵy tyba tilin, Eýropadaǵy gagaýyz tilin, ne bolmasa Baltyq mańyndaǵy qaraıym tilderin jaqsy túsine alady degen paıymyn jetkizgen mınıstr jer betinde 6 táýelsiz túrki memleketi bar ekendigin jastardyń esine saldy.
«Sonyń barlyǵyndaǵy memlekettik til - túrki tili bolyp eseptelinedi. Demek, sizder qazaq tilin biletin bolsańyzdar, 200 mıllıon tilde sóıletin halyqqa kilt tabasyzdar. Ekinshiden, bul sizderdiń ana tilderińiz. Úshinshiden, qaı ulttyń ókili bolsańyz da qazaq tili - Qazaqstan Respýblıkasynyń memlekettik tili. Endeshe bul tilge degen qurmet osy baǵdarlamany oqyp úırenýden bastalady», dep qorytty sózin Mádenıet mınıstri.
