Búkil mektepterdi kúzetpen qamtý qosymsha qarjyny talap etedi - ІІM

ASTANA. QazAqparat – Mektep qaýipsizdigin arnaıy kúzet bólimshelerimen qamtamasyz etý máselesi kóterilip jatqan joq. Bul týraly onlaın-brıfıngte ІІM Kúzet qyzmetin baqylaý departamenti basqarmasy bastyǵynyń orynbasary Serik Quspanov málimdedi, dep habarlaıdy QazAqparat tilshisi.

Vedomstvo ókili eldegi barlyq oqý oryndaryn kúzetpen qamtý úshin shtat sanyn kóbeıtý qajet ekenin aıtty.

Tıisinshe, oǵan bıýdjetten qosymsha qarajat bólinýi tıis.

«Bizdiń departament tikeleı kúzet qyzmeti salasyndaǵy memlekettik saıasatpen aınalysady. Sondyqtan obektilerdiń qaýipsizdigin ishki ister organdarynyń mamandandyrylǵan kúzet bólimsheleri qamtamasyz etedi dep aıta alamyn. Qazir mektep qaýipsizdigin arnaıy kúzet bólimshelerimen qamtamasyz etý máselesi kóterilip jatqan joq. Alaıda, elimizdegi barlyq oqý oryndaryn kúzetpen qamtý úshin shtat sanyn ulǵaıtý qajet. Bul bıýdjetten qosymsha qarjy bólýdi talap etedi», - dep túsindirdi Serik Quspanov.

Sonymen birge ol elimizdegi 3 298 mektep pen 4 214 balabaqshada lıtsenzııalanǵan kúzet qyzmeti joq ekenin málim etti.