Búkil álemde «Jer ýaqyty - 2010» sharasy bastalady

Elimizde birinshi bolyp bul jahandyq aktsııaǵa Shyǵys Qazaqstan oblysynyń Rahman shoqysy turǵyndary qatyspaq, dep habarlaıdy QazAqparat.

Búkilálemdik jabaıy tabıǵat qorynyń (WWF) Shyǵys Qazaqstan oblystyq bólimshesiniń habarlaýynsha, aýyldyq mekenderdegi ákimshilik úılerinde, saýda ortalyqtarynda, mektepterde, kolledjder men ýnıversıtetterde jáne taǵy da basqa ǵımarattarda shamdar sóndiriledi. «Rahman shoqysy» shıpajaıynda demalýshylar sharaqtar jaǵyp, 60 degen sandy qurap jasaıdy.
Atalmysh aktsııa sharýashylyqtar men kommertsııalyq mekemelerdi bir saǵatqa elektr qýat kózin sóndirýge de shaqyrady.

Elimizdiń birinshi resmı qatysýshylary bolyp Astana men Almaty qalasy atandy. Astana ákimi Imanǵalı Tasmaǵanbetov qalanyń mańyzdy nysandaryn - "Báıterek", Aqorda rezıdentsııasy, QR Joǵarǵy soy, Táýelsizdik saraıy, "Qazaq eli" monýmenti aldyndaǵy alańdy, "Nur Astana" Islam ortalyǵy, "Dýman" oıyn-saýyq keshenindegi syrtqy jaryqtardy sóndirýge daıyndyqtardy júrgizýge buıryq berdi.

Almaty qalasynyń ákimi Ahmetjan Esimov "Kóktóbe" telemunarasynyń jaryǵyn, jergilikti ákimshiliktiń jáne taǵy da basqa qalalyq obektilerdiń jaryqtaryn sóndirýge buıryq berdi. Aktsııaǵa daıyndyqtar elimizdiń basqa da qalalarynda - Qaraǵandyda, Shymkentte, Pavlodarda, Aqtóbe, Atyraý, Óskemen jáne taǵy da basqa qalalarda júrgizilýde.

Atalmysh sharaǵa álemniń 100-den asa elderi men myńnan asa qalalar qatysady. Onyń ishinde Máskeý, Chıkago, Dýbaı, Gonkong, Astana, Ystambul, Las-Vegas, London, Los-Andjeles, Rım, San-Frantsısko, Sıngapýr, Sıdneı, Toronto, Varshava jáne taǵy da basqa qalalar bar.

Bıylǵy jylǵy aktsııa adamzat tarıhynda tuńǵysh ret, Gınnestiń rekordtar kitabyna engizýge turarlyqtaı, keń aýqymda ótedi. Álemniń kóptegen qalalarynda jarnamalyq mańdaıshalar, keńse jáne páter jaryqtary sóndiriledi.

«Jer ýaqyty» aktsııasy - Búkilálemdik jabaıy tabıǵat qorynyń jyl saıynǵy halyqaralyq is -sharasy.