Buqaralyq sportty qarjylandyrý nazardan tys qalmaýy kerek

Áńgime bul jerde árıne, barsha jurtty qamtıtyn buqaralyq sport haqynda. Naqtyraq aıtsaq, elimizde turǵyndardyń 23,2 paıyzy ǵana dene shynyqtyrý sharalarymen aınalysady eken. Halyqtyń jetpis paıyzdan astamy sporttan alys júredi. Bul álbette, jurtshylyqtyń sportqa qulqynyń joqtyǵynan emes. Dene shynyqtyrýǵa el arasynda belsendiliktiń tómendigi birinshiden, kóbiniń jumystan qolynyń tımeýine, ekinshiden, sport zaldar abonementiniń qymbat qunyn qaltanyń kótermeýine baılanysty.

Parlament Senatynda ótken Úkimet saǵatynda bolǵan áńgime barysynda buqaralyq sporttyń damýyn tejep turǵan osy jáne ózge máseleler sóz bolyp, olardy tıimdi sheshýdiń joldary ortaǵa salynǵan edi. Otyrysqa arnaıy kelip baıandama jasaǵan Boks boıynsha olımpıadaǵa daıyndaý ortalyǵynyń dırektory Ermahan Ybyraıymov máseleni tótesinen qoıdy. Ol elimizde qaptatyp aýrýhana salýǵa narazylyǵyn bildirdi. «Sportshy retinde 100 mektep salýǵa esh qarsylyǵym joq. Biraq, 100 aýrýhana salýdyń ne qajeti bar? Bul Qazaqstanda tek aýrý adamdar turady degen sóz be? Onyń ornyna, sport keshenderin salyp, aýrýdyń aldyn alǵan jón emes pe? Sondyqtan, 100 aýrýhananyń ornyna 50 aýrýhana, qalǵan 50 aýrýhananyń ornyna 50 sport kesheni salynsa», - deı kelip, sóziniń sońynda elimizde salaýatty ómir salty ulttyq ıdeıaǵa aınalýy kerektigine, sonda ǵana halyq sapasy artyp, básekege qabiletti memleket retinde damıtyndyǵymyzǵa nazar aýdartty.

Al, Bilim jáne ǵylym mınıstrligi ókilderi jergilikti jerlerdegi sport ǵımarattarynyń oqýshylar úshin tegin qyzmet kórsetýi kerektigin aıtady. Olardyń málimdeýinshe, búginde bul máseleniń sheshimin tabý tek atqarýshy bıliktiń quzyrynda eken. Alaıda, senatorlar munymen kelispedi. Olar mınıstrliktiń barlyq sharýany jergilikti bıliktiń ókilettiginde ekenin aıtyp, jaýapkershilikten qutyla almaıtynyn málimdedi. Quzyrly oryn atalmysh problema joıylýy úshin arnaýly normatıvterdi jasap, olardyń oryndalýyn júıeli túrde qadaǵalap otyrýy kerek. Ádistemelik keńesterdi júzege asyrǵany oryndy.

Shyn máninde buqaralyq sporttyń keri ketýi bul jumystyń quqyqtyq tetiktermen tolyqqandy qamtylmaýymen astasyp jatqandaı. Máselen, Astana qalalyq ákimshiligi ókiliniń aıtýynsha, buqaralyq sport jáne dene shynyqtyrý sharalary bıýdjettik baǵdarlamadan tys qalǵan. ıAǵnı, onyń qarjylyq máselesi sheshilmegen. Osynyń saldarynan jumys istep turǵan, materıaldyq bazasy táýir dep aıtýǵa keletin sport mektepterin jekemenshikke berýge amal jasalýda. Al bul degenimiz, olardyń kópshilikke qoljetimdiligin tómendetip, buqaralyq sporttyń damýyn tejeıdi. Sonymen qatar, jurtshylyqtyń sportqa degen qulshynysyn arttyrýdyń birden-bir joly aýla klýbtarymen baılanysty desek, bul jumysty jandandyrý da quqyqtyq turǵyda qoldaýǵa muqtaj. Óıtkeni, onyń bizde naqty mártebesi zańnamalyq túrde aıqyndalmaǵan. Bul qurylymdar júıeli jumys isteý úshin olardyń barlyq is-qımyly, qarjy kózi quqyqtyq turǵyda dáıektelýi kerek.

Problemanyń taǵy bir toby dene shynyqtyrý salasy mamandarynyń tapshylyǵynda bolyp tur. Aýyldyq jerlerde sabaqty kóbine saǵattyq júktemesi jetpeıtin muǵalimder ótkizedi. Birqatar mektepterde bul sabaq sport túrlerine kásibı turǵyda beıimdelý emes, ásheıin doptyń sońynan qýyp júrýge negizdelgen. Saǵat júktemeleri az bolǵandyqtan, mamandardyń da oqytýǵa yntasy az. Olardyń tym bolmasa jattyqtyrýshy bolyp, nápaqa tabýyna múmkindik joq. Oǵan zańnamalyq túrde shekteý qoıylǵan.

Mine, buqaralyq sporttyń osyndaı qadaý-qadaý máseleleri bar. Soǵan qaramastan, elimizde sporttyq biraz sharalar ótkizilip, jeńisti kúnderge jetip jatqanymyz jasyryn emes. Bul jastarymyzdyń erik-jigeri men sportshylardyń otansúıgishtiginiń arqasy dep baǵalaýymyz kerek shyǵar.