Buqaralyq sportty damytý: Mańǵystaýdaǵy aýylda sport kesheni salynyp jatyr
Túpqaraǵan aýdany ákimdiginiń baspasóz qyzmeti málimetinshe, sport kesheni «Aýyl – El besigi» jobasy aıasynda jergilikti bıýdjet qarajatyna salynýda. Syıymdylyǵy 100 orynǵa shaqtalǵan sport kesheniniń qurylys jumysy sáýir aıynda bastaldy. Keshen 2022 jyldyń І toqsanynda paıdalanýǵa beriledi.
«Baýtın aýyly men Atash eldi mekenine ortaq sport keshenin merdiger «Ońdasyn Qurylys» JShS qolǵa aldy. Onda 10 sport túri boıynsha úıirmeler jumys jasaıdy. Degenmen onyń sanyn 20-ǵa jetkizý josparlanýda. Úıirme qatarynda fýtbol, voleıbol, basketbol, dzıýdo, qazaqsha kúres, boks, qol kúresi, bes tas, asyq atý, toǵyzqumalaq oıyndary bar. Aýyl jastary tegin jattyǵa alady. Bul turǵyndar úshin úlken qýanysh bolary sózsiz»,- dedi Túpqaraǵan aýdandyq mádenıet, dene shynyqtyrý jáne sport bóliminiń basshysy Sholpan Nurǵalıeva.