Buqaralyq sport kóptegen adamdarǵa áli de qoljetimdi emes - depýtat
NUR-SULTAN. QazAqparat – Buqaralyq sport óńirlerdegi kóptegen azamat úshin áli de qoljetimdi emes. Bul týraly QR Parlamenti Májilisi Áleýmettik-mádenı damý komıtetiniń tóraǵasy Jámılá Nurmanbetova málim etti, dep habarlaıdy QazAqparat tilshisi.
«Búgingi tańda sporttyq ınfraqurylymynyń qoljetimdigi, dene shynyqtyrý jáne sport boıynsha synyptan tys sabaqtardy júrgizgeni úshin muǵalimderge qosymsha aqy tóleý sekildi birqatar normalar zańnamalyq turǵyda bekitilgen. 2021 jylǵy 1 mamyrdan bastap memlekettik sporttyq tapsyrysty ornalastyrý arqyly balalar men jasóspirimderge arnalǵan sport sektsııalaryn jan basyna shaqqandaǵy qarjylandyrý tetigi iske qosyldy. 2025 jylǵa deıingi Nur Otan partııasynyń saılaýaldy baǵdarlamasynyń oryndalýy jol kartasyn iske asyrý úshin balalar-jasóspirimder dene shynyqtyrý klýbtarynyń sanyn 119-ǵa deıin ulǵaıtý jáne barlyq oblys pen iri aýdan ortalyqtaryna 128 myńnan astam sport sektsııalaryn ashý kózdelgen», - dedi J. Nurmanbetova Májilis komıtetiniń keńeıtilgen otyrysynda.
Onyń aıtýynsha, Qazaqstan boıynsha 2021 jylǵa 40 myńnan astam balany qamtıtyn memlekettik sport tapsyrysyna 5 mlrd teńgeden astam qarajat qarastyrylǵan.
«Qabyldanyp jatqan sharalarǵa qaramastan, buqaralyq sport óńirlerdegi kóptegen azamat úshin áli de qoljetimdi emes. Sondyqtan búgin komıtette eki mańyzdy másele - sporttyq ınfraqurylymnyń qoljetimdigi men qarajatty kásipqoı sporttan buqaralyq sportqa qaıta bólýdi talqylaý jáne olardy sheshýdiń tıimdi joldaryn ázirleý usynylady», - dedi Jámılá Nurmanbetova.
Óz kezeginde QR Parlamenti Májilisi tóraǵasynyń orynbasary Balaım Kesebaeva jergilikti atqarýshy organdardyń aldyna buqaralyq sport pen dene shynyqtyrýdyń qoljetimdiligin qamtamasyz etý mindeti qoıylǵanyn eske saldy.
Joldaýdy iske asyrý úshin ótken jyldyń sońynda (2020 jylǵy 30 jeltoqsanda) «Qazaqstan Respýblıkasynyń keıbir zańnamalyq aktilerine mádenıet, dene shynyqtyrý jáne sport máseleleri boıynsha ózgerister men tolyqtyrýlar engizý týraly» Zań qabyldandy.
«Zańnyń negizgi baǵyty jergilikti atqarýshy organdardyń qoljetimdi sporttyq ınfraqurylymdy qurý boıynsha quzyretin keńeıtý arqyly halyqpen jumys isteý úshin sport nusqaýshylarymen qamtamasyz etý jáne balalar-jasóspirimder dene shynyqtyrý daıarlyǵy klýbtarynyń jelisin keńeıtý bolyp sanalady. Zańda qoldanystaǵy zańnamaǵa balalardyń sport sektsııalaryn jan basyna shaqqanda qarjylandyrý negizinde memlekettik sporttyq tapsyrys tetigin engizý de kózdeledi. Osyǵan baılanysty sporttyq ınfraqurylymdy tek qalalarda ǵana emes, sonymen birge aýdandar men aýyldarda da damytý, halyqtyń irtúrli toptary úshin sporttyq obektilerdiń qoljetimdiligi deńgeıin arttyrý asa mańyzdy», - dedi B.Kesebaeva.
