Buqaralyq sharalarda júris-turys qaǵıdalaryn buzǵandar jaýapqa tartylady - ІІM
ASTANA. QazAqparat - Búgin Senattyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine sporttyq jáne sporttyq-buqaralyq, oıyn-saýyq mádenı-buqaralyq is-sharalar ótkizý kezinde qaýipsizdikti qamtamasyz etý máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady.
Atalǵan qujat sporttyq-buqaralyq, mádenı oıyn-saýyq jáne basqa da is-sharalaryn uıymdastyrýǵa, ótkizýge baılanysty quqyqtyq qatynastardy retteýge baǵyttalady. «Bul rette zań jobasymen sharalardy ótkizý úshin jergilikti atqarýshy organdar uıymdastyrý komıtetterin quratyn bolady. Olar sharalardy ótkizýge tartylǵan uıymdardyń qyzmetin úılestiredi. Jeke tulǵalardyń mádenıet, dene shynyqtyrý, sport salasyndaǵy quqyqtary men mindetteri aıqyndalyp, olardyń sharalarǵa barýy kezindegi tyıym salýlary men shekteýleri keńeıtiledi. Osyǵan baılanysty jeke tulǵalarǵa atalǵan sharalardaǵy minez-qulyqtyń, júris-turys qaǵıdalaryn buzǵany úshin ákimshilik jaýaptylyq engiziledi», - dedi Іshki ister mınıstri Qalmuhanbet Qasymov. Budan bólek, buqaralyq sharalar ótkiziletin oryndarǵa alkogol ónimderin, sonymen birge, metall jáne shyny qutydaǵy, pırotehnıkalyq jáne basqa da adam ómiri men densaýlyǵyna qaýip tóndiretin kez kelgen zattar men ónimderdi ákelýge tyıym salynady. Sonymen qatar sharalar ótkiziletin ýaqytta áleýmettik, násildik, ulttyq, dinı arazdyqty qozdyrýǵa baǵyttalǵan, sol sekildi jeke tulǵalardyń quqyqtaryna nuqsan keltiretin plakattardy, emblemalardy, transporanttardy jáne ózge de kórnekti zattardy paıdalanýǵa tyıym salynady. Bundaı tyıym salýlardy buzǵany úshin jeke tulǵalarǵa jıyrma aılyq eseptik kórsetkish mólsherinde aıyppul salynady, ákimshilik jaýaptylyqqa tartylady. Stsenalar men arenalarǵa adam ómiri men densaýlyǵyna qaýip tóndiretin kez kelgen zatty laqtyrýǵa zańmen tyıym salý usynylǵan. Tutastaı alǵanda, sporttyq jáne sporttyq-buqaralyq, oıyn-saýyq mádenı-buqaralyq is-sharalardy uıymdastyrý jáne ótkizý erejelerin retteıtin qujat Ákimshilik quqyq buzýshylyq týraly kodeksine, «Mádenıet týraly» jáne «Dene shynyqtyrý jáne sport týraly» zańdaryna túzetýler engizýdi kózdeıdi.
