«Buqaralyq aqparat quraldary týraly» zańǵa ózgeris engizildi

ASTANA. 9 aqpan. QazAqparat /Arman Asqarov/ - «Zııatkerlik menshikti jetildirý máseleleri jónindegi keıbir zań aktilerine ózgerister men tolyqtyrýlar engizý týraly» Zań «Buqaralyq aqparat quraldary týraly» Zańǵa ózgeris engizdi. Bul týraly búgin Astanada ótken baspasóz máslıhatynda QR Internet qaýymdastyǵynyń prezıdenti Shavkat Sabırov málim etti.

Atap aıtqanda, «Buqaralyq aqparat quraldary týraly» Zańnyń 13-baby, 3-tarmaǵynda «ótkizý tártibi týraly» degen sózderden keıin «Internet jelisindegi avtorlyq quqyq jáne sabaqtas quqyqtar týraly» degen sózder jazylatyn bolady. Budan basqa, 17-baptyń 1-tarmaǵy «1. Redaktsııa, ınternet-resýrstyń menshik ıesi paıdalanylatyn zııatkerlik menshik quqyǵynyń obektilerine quqyqtardy, onyń ishinde zııatkerlik menshikke avtorlyq, sabaqtas jáne ózge de quqyqtardy saqtaýǵa mindetti», - dep ózgertildi. Al 24-baptyń 3-tarmaǵy mynadaı redaktsııada jazylatyn boldy: «3. Qazaqstan Respýblıkasynyń Konstıtýtsııasyn jáne osy Zańnyń normalaryn buzatyn sheteldik buqaralyq aqparat quraldarynyń ónimin taratýǵa sot tártibimen tyıym salynady, al ınternet-resýrstar bolyp tabylatyn sheteldik buqaralyq aqparat quraldary úshin - Qazaqstan Respýblıkasynyń aýmaǵynda kórsetilgen ınternet-resýrstarǵa qol jetkizýdi toqtata turý kózdeledi».

Aıta ketken jón, aǵymdaǵy jyly qańtardyń 12-si kúni memleket basshysy «QR Zııatkerlik menshikti jetildirý máseleleri jónindegi keıbir zań aktilerine ózgerister men tolyqtyrýlar engizý týraly» Zańǵa qol qoıǵan bolatyn. 31 qańtardan bastap atalǵan zań kúshine endi.