Buqaralyq aqparat quraldary qarjylandyrý kózderin ártaraptandyrýy kerek
ALMATY. Qarashanyń 26-sy. QazAqparat /Erlik Erjanuly/ - Qazaqstannyń aqparat keńistigindegi ahýal jaqyn arada ózgermeıdi.
Bul "Daǵdarys kezeńindegi Qazaqstan medıa ındýstrııasy: týyndaǵan jaǵdaılar men sheshimder" degen atpen ótken ІІ medıa quryltaıda málim boldy. Pikirsaıysqa qatysýshylardyń paıymdaýynsha, qazirgi qarjylyq-ekonomıkalyq daǵdarys medıa naryqtyń damýyndaǵy olqylyqtardy aıqyn kórsetip berdi. Máselen, qazaq jáne orys tildi basylymdardyń basyn tek memlekettik aqparattyq tapsyrys qana biriktiredi. Onda kóteriletin máseleler bir-birimen qabyspaıdy. Olar árqıly álemde ómir súredi. Oǵan bólingen memleket qarjysy asa tıimdi jumsalyp jatqan joq. Máselen, qazir sheteldik telearnalardan kóshirilip beriletin habarlardyń kópshiligi onda memlekettik tapsyrys boıynsha jasalady. Mundaı jaǵdaıda aqparattyq qaýipsizdik pen táýeldilik týraly aıtý ońaı emes. Bul jáıtterdi quryltaıǵa arnaıy kelip qatysqan Mádenıet jáne aqparat vıtse-mınıstri Ǵazız Telebaev ta jasyrmady.
"Memlekettik aqparattyq tapsyrys bıyl 182 taqyryp boıynsha berildi. Bul óte kóp. Pikirtalas kezinde memleket jekelegen aqparat quraldaryn emes, tutas aqparattyq keńistikti damytýy kerektigi týraly oı aıtyldy. Men oǵan tolyǵymen qosylam. Biraq bul óte kúrdeli másele. Ol bizdiń mınıstrliktiń ǵana quzyryndaǵy is emes. Memlekettik tapsyrysty oryndalýyn tekseretin quzyrly mekemeler bizde de baspasóz materıaldaryn santımetrlep, al tele-radıo habarlaryn uzaqtyǵyna qarap ólshep jatady», degen Ǵ. Telebaev, bul máseleni jaqyn arada ózgertý qıyn sharýa ekenin jetkizdi.
Pikirtalas kezinde otandyq aqparat quraldarynyń qarjylandyrý kózderin ártaraptandyrý máselesi de jan-jaqty talqyǵa tústi. Máselen KTK telearnasynyń Bas dırektory Arman Shuraev aqparat quraldary bıýdjetiniń teń jartysyn qural-jabdyqtardy jańartý, jańǵyrtý jumystary quraıtynyn aıtty. Teleradıo habarlaryn taratý qaýymdastyǵynyń jetekshisi Sholpan Jaqsybaeva BAQ-ty qosymsha qun salyǵynan bosatý tek iri kásiporyndar men holdıngterge ǵana tıimdi bolatynyn jetkizdi. Sondyqtan quryltaıda aıtylǵan usynystar men ıdeıalardy sarapqa salǵan kezde BAQ-ty qosymsha qun salyǵynan (QQS) bosatýmen tyǵyryqtan shyǵý qıyn ekenin qatysýshylardyń kóbi moıyndady. Olardyń sózine qaraǵanda, quzyrly organdar BAQ-ty QQS bosatýdy emes, ony azaıtý nemese jeńildikterdi engizý jaıyn qarastyrýy qajet. Qazirgi tańda kóptegen aqparat quraldary memlekettik tapsyrystan aırylyp qalmaý úshin óz mazmunyn suıyltyp aldy. Olar negizinen bolashaqqa boljam jasap, saraptamalar jasaýdyń ornyna kúndelikti kúıki tirliktiń aıasynan shyǵa almaı júr. Medıa naryqtyń damýyndaǵy júıesizdik daǵdarystan buryn qalyptasqan. Qazir ol tek shyrqaý shyńynda tur.
