Buqaralyq jáne olımpıadalyq sport túrlerin jetildirýde aýqymdy jumystar kútip tur - Marjyqpaev
ASTANA. KAZINFORM — Búgin elordada Qazaqstan Respýblıkasy Týrızm jáne sport mınıstrliginiń Dene shynyqtyrý jáne sport, oıyn bıznesi men lotereıa qyzmetin retteý salalaryndaǵy 2023 jylǵy qyzmeti men 2024 jylǵa qoıylǵan negizgi mindetteri týraly keńeıtilgen Alqa májilisi ótti.
Basqosýǵa QR Premer-Mınıstriniń orynbasary T.Dúısenova, Týrızm jáne sport mınıstri E.Marjyqpaev, QR Parlamentiniń depýtattary, mınıstrlikke baǵynysty uıymdardyń basshylary, Parıjdegi Olımpıada jáne Paralımpıada oıyndaryna daıyndyq jumystaryn úılestirýshi shtabtyń, Dúnıejúzilik kóshpendiler oıyndaryn daıyndaý jáne ótkizý jónindegi dırektsııa, óńirlik sport basqarlamalarynyń ókilderi, sport ardagerleri qatysty.
Alqa májilisinde birinshi bolyp sóz alǵan Ermek Marjyqpaev el abyroıyn asqaqtatar eleýli salany damytý, sportqa beıim, básekege qabiletti biregeı ult, salıqaly urpaq qalyptastyrý – árqaısymyzdyń boryshymyz ekenin atap ótti.
«Memleket basshysy Qasym-Jomart Toqaev: «Buqaralyq sportty damytý arqyly biz ultymyzdyń densaýlyǵyn jaqsartamyz, búkil elimiz maqtan tutatyn sport juldyzdarynyń jańa býynyn tárbıelep shyǵaramyz» dep aıtqan bolatyn. Sonymen birge sport salasyna túbegeıli ózgerister qajet ekenine basa nazar aýdaryp, salanyń strategııalyq damýynyń basym baǵyttaryn belgilep berdi.
Mınıstrlik aldynda buqaralyq sportty damytý men olımpıadalyq sport túrlerin jetildirýde aýqymdy jumystar tur. Buqaralyq sport saýlyǵymyzdy nyǵaıtýǵa baǵyttalsa, úlken jetistikterge jeteleıtin sport – eldiń oń ımıdjin qalyptastyrady. Osy rette, Kanvonda Jasóspirimderdiń qysqy Olımpıadasy ótkenin bilesizder. Qazaqstan quramasy Koreıa jerindegi baıraqty básekede el namysyn abyroımen qorǵap, jankúıerlerdi tarıhı júldelerimen qýantty. Jerlesterimiz bir altyn, eki kúmis medal jeńip aldy. Mundaı jeńister úzdiksiz daıyndyq pen qoldaýdyń arqasynda keledi. Bul rette, byltyr biz salanyń strategııalyq damý baǵdaryn aıqyndap, Dene shynyqtyrý men sportty damytýdyń 2029 jylǵa deıingi tujyrymdamasyn qabyldadyq», - dedi Ermek Marjyqpaev.
