Buqara - Oral jobasy aıasynda 160 shaqyrym gaz qubyry tartylady
AQTÓBE. QazAqparat - Aqtóbe oblysy birer jyldan soń gaz tapshylyǵyn sezýi múmkin. Sondyqtan Buqara-Oral gaz qubyrynyń qurylysy bastalady, dep habarlaıdy QazAqparat tilshisi.
Aqtóbe oblysynyń ákimi Berdibek Saparbaev Elbasy Nursultan Nazarbaevqa birneshe joba usynǵan bolatyn. Sonyń biri - Buqara-Oral gaz qubyrynyń qurylysy.
Búgin oblys ákimdiginde jańa jobanyń tehnıkalyq-ekonomıkalyq negizdemesi daıyndalyp jatqany aıtyldy.
«Aqtóbedegi magıstraldy gaz qubyrlary qazir óz qýatynan asyra jumys istep tur. Óńirdegi jańa óndiris oryndary iske qosylsa, gaz tapshylyǵy seziledi. Sondyqtan Buqara-Oral jobasy usynylyp, Úkimetke tapsyrma berildi. Jańajol ken ornynan Hromtaýǵa, keıin Aqtóbege qubyr tartylady. Uzyndyǵy - 160 shaqyrym. Quny - 20-30 mıllıard teńge. Qazir Úkimetpen, «QazTransGaz» AQ-men jumys júrip jatyr», - dedi oblys ákimi Berdibek Saparbaev.
Óńir basshysynyń aıtýynsha, gaz jetkilikti. Ótken jyly 7 mıllıard tekshe metr gaz óndirildi. Onyń 2 mıllıard tekshe metri ishki suranysty qamtysa, ózgesi elimizdiń basqa óńirleri men shetelge shyǵarylyp jatyr.
«Dalaǵa janyp jatqan gazdy toqtatý jolynda jumys istep jatyrmyz. Ásirese, túnde jaǵady. Ekologııa departamenti túnde tekserýi qajet», - dedi B.Saparbaev.
