Buqara halyqtyń usynysyn eskermeı, mektep oqýshylarynyń demalys kúnderine qatysty birjaqty sheshim qabyldaýǵa bolmaıdy - B.Jumaǵulov

Bilim jáne ǵylym mınıstrliginiń baspasóz qyzmeti taratqan málimetterge qaraǵanda, mınıstr Baqytjan Jumaǵulov mektep oqýshylarynyń, olardyń ustazdary men ata-analarynyń jáne buqaralyq aqparat quraldary ókilderiniń mektep oqýshylarynyń demalys tártibine ózgeris engizý jónindegi ótinishterine osyndaı jaýap qaıtarǵan.

Mınıstrdiń aıtýynsha, bul máselege baılanysty ata-analardan da ustazdardan da kóptegen usynys, pikirler túsip jatyr. Alaıda bul máseleni erikti túrde sheshýge bolmaıdy. «Bul baǵytta bizge álemdik tájirıbeni jiti zerttep, ózimizge usynylyp otyrǵan usynystardyń artyqshylyqtary men kemshilikterin saraptap alý kerek. Sondaı-aq atalmysh máselege qatysty buqaranyń da pikirimen sanasý kerek. Osy sebepti  meniń buıryǵymmen arnaıy jumys toby quryldy. Onyń quramyna Parlament depýtattary, múddeli mınıstrlikter men vedomstvo ókilderi, bilim basqarmalarynyń basshylary men pedagogtar, ata-analar qoǵamdastyǵy men úkimettik emes uıym ókilderi kirdi»,-deıdi B.Jumaǵulov.

Onyń aıtýynsha, kún tártibine qoıylyp otyrǵan másele bir kúnde bite salatyn jumys emes. Oǵan jyldar ketýi múmkin. Onyń ústine jumys tobynyń usynys, pikirleri de Úkimettiń jáne bilim basqarmalarynyń qatysýymen muqııat talqylanýy tıis. Óıtkeni bul memlekettik másele, oǵan qatysty tek qoǵam ókilderiniń usynys, pikirlerimen sanasqannan keıin ǵana birjaqty sheshim qabyldaýǵa bolady. «Bul rettegi bizdiń basty maqsatymyz - oqý sharalarynyń tıimdiligin qamtamasyz etip qana qoımaı, balalardyń densaýlyqtaryna da nazar aýdarý. Bul bizdiń ylǵı este ustaýymyz qajet mańyzdy mindetterdiń biri», - dedi mınıstr.