Buqar jyraýdyń 350 jyldyǵyna aýqymdy jarystar ótti - Qaraǵandy oblysy
QARAǴANDY. QazAqparat - Qaraǵandy oblysynda qazaqtyń kómekeı áýlıesi Buqar jyraýdyń 350 jyldyq mereıtoıynda aýqymdy sporttyq saıystar uıymdastyryldy, dep habarlaıdy óńir basshysynyń resmı saıty.
Qatysýshylar týrnırlerde ulttyq sport túrleri boıynsha baq talasty: qazaqsha kúres, asyq atý, aýdaryspaq, kókpar, alaman báıge jáne top báıge. Júldege qymbat kólikter men Astanadan páter tigildi.
Qazaqsha kúres boıynsha 60-tan 90 keli salmaq dárejesine deıin palýandar baq synady. Al aýdaryspaqta absolıýttik salmaq dárejesi 80 keliden joǵary boldy. Kúreste 70 kelige deıingi salmaq dárejesi boıynsha jeńimpazǵa bas júldege «Toyota Camry 55» jeńil kóligi tigildi. Bul syılyq dzıýdodan halyqaralyq deńgeıdegi sport sheberi, kóptegen jarystardyń jeńimpazy jáne dzıýdodan Qazaqstan quramasynyń múshesi, Buqar jyraý aýdanynyń Úmitker aýylynan Abylaıhan Sharatovqa buıyrdy. Ekinshi oryndy Qazbek Qabdyǵalıev, úshinshi oryndy Zańǵar Marat jeńip aldy. 
- Búgin barlyq qarsylastarym myqty boldy. Meni Buqar jyraý babamyzdyń árýaǵy qoldaǵan shyǵar, jeńis tuǵyrynan kórindim, - deıdi 23 jastaǵy sportshy Abylaıhan Sharatov.
Qazaqsha kúresten 90 kelige deıingi salmaq dárejesi boıynsha týrnırde Buqar jyraý aýdanynyń Botaqara kentinen Erǵanat Moldaǵulov jeńimpaz atandy. Apaıtós palýan da «Toyota Camry» avtokóligin ıelendi. Aıan Qurmanbaı - ekinshi, Meırambek Janabaı úshinshi oryndy mise tutty.
Aýdaryspaqta absolıýttik 80 keliden artyq salmaq dárejesi boıynsha Nura aýdanynan kelgen Janbolat Taıjanovqa teń keler eshkim bolmady.
- Ulttyq sport túrleri boıynsha jarystar Buqar jyraýdyń 350 jyldyǵyna arnalyp uıymdastyryldy. Qazaqsha kúres, at jarysy jáne alaman báıgege degen qyzyǵýshylyq joǵary. Top báıgege qatysýǵa 20 adam ótinish bergen. Onyń ishinde Reseı men Qyrǵyzstan elderinen de boldy. Bul jarystarda bas júldege Astana qalasynan bir bólmeli páter tigildi, - dedi Qaraǵandy oblysynyń dene shynyqtyrý jáne sport basqarmasy basshysynyń orynbasary Rústem Qojabekov.
Top báıgede Almaty oblysy Talǵar aýdanynyń turǵyny Meıirhan Bulǵynovtyń sáıgúligi top jardy. Ekinshi bolyp máre syzyǵyn taǵy da almatylyq Alınur Nazarbaevtyń tulpary kesti. Úshinshi Qaraǵandy turǵyny Talǵat Zeınýllınniń aty keldi.
Alaman báıgede 27 tulpardyń ishinde qaraǵandylyq Nurlybek Muhamedııarovtiń sáıgúligi oza shapty. Sóıtip ıesine «Toyota Prado» kóligin syılady. Ekinshi orynnan Buqar jyraý aýdanynyń turǵyny Serik Túlkibaevtyń tulpary kórinse, úshinshi bolyp Almaty oblysy Talǵar aýdanynyń turǵyny Meıirhan Bulǵynovtyń júırigi máre syzyǵyn kesti. Ekinshi oryn ıegerine kvdrotsıkl, al úshinshi orynǵa teledıdar tabystaldy.
Kókparǵa Qaraǵandy oblysynan 4 komanda qatysty. Onyń ishinde Abaı aýdanynyń kókparshylary jeńimpaz atanyp, 500 myń teńgege ıe boldy. Toı ıeleri - buqarjyraýlyqtar ekinshi oryndy qanaǵat tutty. Al Shet aýdanynyń komandasy úshinshi orynnan kórindi.
Asyq atýda 2003 jáne 2005 jyldary týylǵandar ózara myqtyny anyqtady. Bul saıysta bas júlde 100 myń teńgeniń sertıfıkaty boldy. Ol syıaqy Shet aýdanynan kelgen Aısultan Boranbaıǵa buıyrdy. Ekinshi oryn da Shet aýdanynyń namysyn qorǵaǵan Nursultan Kakenovtiń qanjyǵasynda ketti. Al úshinshi oryndy Buqar jyraý aýdanynyń ókili Ádilhan Tólegenov jeńip aldy.
Jarystarǵa tigilgen barlyq júldeler Buqar jyraý aýdanynyń kásipkerleri men sharýa qojalyqtarynyń demeýshiligimen júzege asty.
Esterińizge salaıyq, Qaraǵandy oblysynda uly oıshyl Buqar jyraýdy 350 jyldyǵy toılandy. Halyqtyq saıran-saýyq Botaqara kentinen 55 shaqyrym jerde arnaıy tigilgen kıiz úıler qalashyǵynda ótti.
