Buqar jyraýdyń 350 jyldyǵy: Qaraǵandyda respýblıkalyq músháıra ótedi
ASTANA. QazAqparat - 14 qyrkúıek kúni Qaraǵandydaǵy «Shalqyma» kontsert zalynda Buqar jyraýdyń 350 jyldyǵy men Astananyń 20 jyldyǵyna arnalǵan «Óleń - sózdiń danasy» atty respýblıkalyq músháıra ótedi, dep habarlaıdy ákimdiktiń baspasóz qyzmeti.
Músháıranyń maqsaty - memlekettik tildiń mártebesin arttyrý, til mádenıetin kóterý, Buqar jyraýdyń ádebı murasyn jáne tarıhtaǵy eleýli ornyn nasıhattaý, aqyn-jyraýlardyń shyǵarmashylyǵyna qoldaý kórsetý arqyly jyraýlyq poezııanyń damýyna yqpal etý. Músháırany Qaraǵandy oblysy ákimdiginiń qoldaýymen Oblystyq tilderdi damytý jónindegi basqarmasy uıymdastyrdy.
Jyr báıgesine 16-35 jas aralyǵyndaǵy úmitkerlerdiń jyraýlyq poezııa úlgisinde jazylǵan shyǵarmalary qabyldandy. Qatysýshylar tarapynan Buqar jyraýǵa arnalǵan óleńdermen qatar Elordamyz - Astananyń 20 jyldyǵy jáne qoǵamdyq-áleýmettik máselelerdi tolǵaǵan týyndylar usynyldy. Baıqaýǵa respýblıkanyń 11 óńirinen jáne atalǵan oblystan barlyǵy 50 úmitkerden ótinim kelip tústi.
Sonyń ishinen qazylardyń qatal eleginen ekshelip, Astana qalasy, Almaty, Atyraý, Jambyl, Qostanaı, Pavlodar, Túrkistan oblystarynan tańdaýly 17 júırik júldege talasady.
Músháıranyń jeńimpazy jáne júldegerler dıplomdarmen, alǵys hattarmen jáne aqshalaı syılyqtarmen marapattalady.
Bas júlde - 500 000 teńgeni qurady.
