Buqar jyraý aýdanyndaǵy sý tasqynyna qarsy sharalar pysyqtaldy
ASTANA. QazAqparat - Kóktemgi merzim qarsańynda Qaraǵandy oblysynyń TJ departamenti oblystyń sý basý qaýpi bar aımaqtaryn aralady. Departament basshysy I.Kúlshimbaev Buqar jyraý aýdanyna bardy.
Sapar barysynda sý tasqyny zardaptarynyń aldyn alý úshin jumyldyrylatyn 36 tehnıka men 57 adamnyń daıyndyqtary tekserildi. Sonymen qatar TJD basshysy Buqar jyraý aýdanynyń Tótenshe jaǵdaıdyń aldyn alý jáne joıý boıynsha kezekten tys komıssııa otyrysyna qatysty. Ondaǵy basty másele - 2017 jylǵy sý tasqyny kezeńine daıyndyq boldy, dep habarlaıdy oblystyq TJD baspasóz qyzmeti.
Aýdandyq ákimdiktiń tóraǵalyǵymen ótken jıynǵa Buqar jyraý aýdanynyń prokýrory, kent, aýyl ákimderi, azamattyq qorǵanys qyzmetteriniń basshylary, gıdrotehnıkalyq qurylystardyń ıeleri, BAQ ókilderi, «Qazsýshar» RMK basshysy, «Qaraǵandy sý qoımalary» QMK, «KNIIRS» JShS, «Sport-Ómiri» JShS jáne basqa da múddeli organdardyń ókilderi qatysty.
Aýdan ákiminiń aqparaty boıynsha bıylǵy kóktemge daıyndyq aıasynda sý tasqynynan halyqty, aýyl sharýashylyq sýbektilerin qorǵaý boıynsha aýdandyq is-sharalar jospary ázirlenip, bekitildi.
Aýdandyq top 878 adam, 363 tehnıka, 229 qural-jabdyq, qaıyqtardan jasaqtalady.
Qazir 29 tonna janarmaı, 1,2 mln teńgeniń dári - dármek qory jasalǵan. Kóshirilgen turǵyndardy azyq - túlikpen qamtamasyz etý boıynsha kelisim sharttar jasaldy.
Aýdannyń sý obektilerine jaqyn ornalasqan eldi mekenderdiń sý basýyn boldyrmaý maqsatynda merdigerlik uıym 9 eldimekendi tekserdi, muzdy jarý jumystaryn júrgizýge shart jasaldy.
Aýdannyń 20 eldi mekeni qulaqtandyrý lokaldy júıelerimen jabdyqtaldy, taǵy da 4 eldi mekende qurý josparlanyp otyr.
Sonymen qatar, DEÝ-1 «Qaraǵandy joldary» JShS, DEÝ-45 ı DEÝ-46 «Qazaqavtojol» RMK QF jol uıymdarynyń basshylary tyńdaldy.
