Buqar Jyraý aýdanynda sút-taýar fermasy jáne balyq óńdeý tsehy ashylmaq
QARAǴANDY. QazAqparat – Bıylǵy jyly Buqar Jyraý aýdanynda kartop pen kókónis daqyldarynyń túsimin arttyrý, avtomattandyrylǵan sút-taýar fermasyn, balyq óńdeý tsehyn ashý jáne malǵa arnalǵan brıkettelgen jem-shóp óndirý josparlanyp otyr. Aýdan ákimi Shaǵýrashıd Mamalınov aýdannyń 2020 jylǵy áleýmettik-ekonomıkalyq damý qorytyndylaryn, sondaı-aq aldaǵy kezeńge arnalǵan mindetterdi atap ótti. Baıandama óńir basshysy Jeńis Qasymbektiń tóraǵalyǵymen onlaın-keńes aıasynda ótti, dep habarlaıdy QazAqparat tilshisi.
Buqar Jyraý aýdanynda jańa ınvestıtsııalyq jobalarǵa erekshe kóńil bólinedi. «Aprel» fermerlik kásiporny jobalyq qýattylyqqa shyqty. Bıyl Novoýzenka aýylynda 25 myń basqa arnalǵan mal sharýashylyǵy kesheniniń ekinshi kezeńin iske qosý josparlanýda.
«Bul óndiris tolyǵymen avtomattandyrylǵan eń ınnovatsııalyq keshen bolady. Sondaı-aq, «Bereke-2014» kompanııasyna 1 200 bas ІQM ósirý boıynsha reprodýktor qurýǵa ınvestıtsııalar tartyldy», - dedi Shaǵýrashıd Mamalınov.
Qyzylqaıyń aýylynda «Jasyl Jer» ÁKK ınnovatsııalyq tehnologııalar boıynsha túıirshiktelgen jemshóp óndirisin, al Aqbel okrýginde tsıfrlyq sút-taýar fermasyn iske qosýdy josparlap otyr. Bul jobany júzege asyrý úshin Suthana kompanııasy 600 bas ІQM satyp alady. Qaraǵandy balyq tálimbaǵy aýdanda balyq óńdeý tsehyn iske qosýǵa daıyndalýda.
Turǵyn úı máselesi de nazardan tys qalmaıdy. Doskeı aýylynda eki úı qalpyna keltiriledi. Halyqtyń áleýmettik osal toptary, kóp balaly otbasylar men jetim balalar úshin turǵyn úı satyp alý jalǵastyrylady. Bıylǵy jyly 298 otbasyn baspanamen qamtamasyz etý josparlanǵan.
2020 jyly Doskeı, Novoýzenka, Úshtóbe jáne Kókpekti aýyldarynda 386 jer ýchaskesi berildi. Osynyń negizinde aýdanda bolashaqta tórt abattandyrylǵan kent damytylatyn bolady. Barlyq úılerdi ınjenerlik kommýnıkatsııalarmen qamtamasyz etý kózdelip otyr. Qazir biryńǵaı sáýlet formasy men tús gammasy saqtalýy úshin jumystar júrgizilýde.
Ótken jyly aýdannyń on eki eldi mekeni sýmen qamtamasyz etildi. 2021 jyly taǵy toǵyz aýylda ortalyq sýmen jabdyqtaý júıesin ornatý josparlanýda.
Mańyzdy mindet - aýdandy jylýmen qamtý. Bes blokty-modýldi qazandyq salyndy. Aıta ketý kerek, qazandyqtar qos jabdyqty bolyp tabylady. Olar gazǵa da qosylýǵa daıyn. Sondaı-aq, qoldanystaǵy qazandyqtardy jóndeý jáne jańǵyrtý, jylý jelilerin júrgizý jalǵasady.
«Ótken jyly aýdan bıýdjeti eki esege artty. «Aýyl - El besigi» jobasy aıasynda kentishilik joldar, mektepter jóndeldi, DSK qurylysy bastaldy. Jumyspen qamtý jol kartasy boıynsha 30 joba qarjylandyryldy. Bul negizinen ınjenerlik-tehnıkalyq jeliler, qasbetterdi, shatyrlardy jańartý. Úsh 16 páterli jáne alty 12 páterli jalǵa beriletin úı paıdalanýǵa berildi. Biz turǵyn úı qurylysyna erekshe kóńil bólemiz. Bıylǵy jyly bul máseleni barynsha pysyqtaý kerek», - dep atap ótti Jeńis Qasymbek.
