Buqar Jyraý atyndaǵy mýzeı 25 jyldyń ishinde 50 myńdaı jádigermen tolyqqan - Pavlodar
ASTANA. QazAqparat - Pavlodar qalasyndaǵy Buqar Jyraý atyndaǵy ádebıet jáne óner mýzeıiniń qurylǵanyna bıyl 25 jyl toldy.
Mýzeı dırektory Roza Igibaevanyń aıtýynsha, búginde mýzeı qorynda 50 myńdaı qundy jádiger saqtalǵan dep habarlaıdy pavlodarnews.kz .
«Mýzeı 1992 jyly alǵash ashylǵan kezde 4 myńdaı jádiger bolǵan.Keıin eki jyl ýaqyt ishinde jerles aqyn-jazýshylarǵa tıesili 2000-nan asa ádebı materıal jınaqtaldy. Bul óte úlken kórsetkish. Qazirgi tańda Máshhúr Júsip Kópeev, Júsipbek Aımaýytov, Qoshmuhambet Kemeńger, Jaıaý Musa, Maıra Shamsýtdınova, Jumat Shanın, Sháken Aımanov, Estaı Berkimbaev, Isa Baızaqov sekildi taǵy da basqa qazaqtyń óner, mádenıet jáne ǵylym qaıratkerleriniń qoljazbalary, kitaptary jáne jeke zattary bizde ǵana saqtalǵan. Osy eksponattardy jınaqtap, ony halyqqa nasıhattaý jolynda mýzeı qyzmetkerleriniń eńbegi ólsheýsiz. Sondyqtan barsha áriptesterimdi osynaý mereıtoımen quttyqtap, shyǵarmashylyq tabys tileımin, - dedi Roza Igibaeva. Mýzeı basshysynyń aıtýynsha, munda qyzmetkerlerdiń uıymdastyrýymen jylyna 500-den astam tarıhı-tanymdyq is-shara uıymdastyrylyp, mýzeı qoryndaǵy jádigerlerdi 30 myńdaı adam tamashalaıdy.
«Osy ýaqytqa deıin kóptegen aımaqtar men qalalardy jáne Pavlodar oblysyna qarasty aýyldardy aralap, kóshpeli kórme ótkizdik. Búgingi tańda óńirge belgili Tańdaı Keneevti urpaqqa tanytý úshin ádebıetshi-ǵalymǵa tıesili qundy zattar men qoljazbalaryn, kitaptaryn jınastyrýdamyz. Sonymen qatar Pavlodar oblysynda turatyn Qazaqstan Jazýshylar odaǵy músheleriniń týyndylaryn mýzeı tórine qoıyp jatyrmyz», - deıdi dırektor.
Shara barysynda Meıramǵalı Esmuhanov, Álııa Samatova jáne Elena Sorokına sekildi mýzeı qyzmetkerlerine oblys ákiminiń Qurmet gramotasy tabys etildi. Sonymen qatar «Nur Otan» partııasy oblystyq fılıaly, oblystyq mádenıet, qujattama jáne arhıvter basqarmasy jáne Estaı atyndaǵy qalalyq mádenıet saraıynyń ókilderi de mýzeı ujymyn mereıli 25 jyldyǵymen quttyqtady.
