Býhgalterler endi jeke tulǵa retinde ákimshilik jaýapqa tartylýy múmkin
ASTANA. KAZINFORM — Elimizde býhgalterlerge ákimshilik jaýapkershilik kúsheıtilmek. Qazir Májilis otyrysynda «Qazaqstan Respýblıkasynyń Ákimshilik quqyq buzýshylyq týraly kodeksine ózgerister men tolyqtyrýlar engizý týraly» Qazaqstan Respýblıkasy Zańynyń jobasy birinshi oqylymda qaralyp jatyr.
«Meniń suraǵym - Qazaqstan Respýblıkasynyń býhgalterlik jáne qarjylyq esep týraly zańnamasyn buzý týraly Qylmystyq kodekstiń 241-babyn tolyq qylmystyq sıpattan aryltýǵa baılanysty. Býhgalterlerdiń jaýapkershiligin Ákimshilik quqyqbuzýshylyq kodeksiniń 239-babyna aýystyrý usynylyp otyr. Bul usynysty men qoldaımyn. Ákimshilik quqyq buzýshylyq týraly kodekstiń qoldanystaǵy 238-babynda býhgalterlerdiń jaýapkershiligi qarastyrylǵan. Nelikten olar bapqa ózgerister engizilip otyr?» — degen saýal qoıdy Májilis depýtaty Danabek Isabekov.
Saýalǵa Zańnama jáne sot-quqyqtyq reforma komıtetiniń múshesi Abzal Quspan jaýap berdi.
«Qoldanystaǵy Ákimshilik quqyq buzýshylyq týraly kodekste zańdy tulǵalardyń jaýapkershiligi kózdelgen. Biz endi jeke tulǵa retinde de jaýapkershilikke tartýdy engizip otyrmyz, ıaǵnı qylmystyq isten alyp ákimshilik jaýapkershilikke almastyrdyq. Buryn tek zańdy tulǵalar jaýapqa tartylyp keldi, endi jeke tulǵa retinde ákimshilik jaýapkershilikti qarastyratyn bolamyz», — dedi A. Quspan.
Aıta keteıik, Memleket basshysy Qasym-Jomart Toqaev byltyrǵy Joldaýynda ekonomıkalyq sıpattaǵy keıbir zań buzý áreketterin qylmys sanatynan alyp tastaý jumysyn jalǵastyrý qajettigin aıtqan-dy. Prezıdenttiń dál osy tapsyrmasyna oraı ázirlengen zań jobasy Májilistiń qaraýyna tústi. Qujat depýtattar tarapynan búge-shigesine deıin talqylanyp, jan-jaqty súzgiden ótkizilmek. Osy oraıda, Kazinform Májilis depýtaty, Zańnama jáne sot-quqyqtyq reforma komıtetiniń múshesi, zań jobasy avtorlarynyń biri Abzal Quspanmen suhbattasqan bolatyn.
