Búginnen bastap Sıan – Almaty baǵytynda jolaýshylar poıyzy qatynaıdy
ASTANA. KAZINFORM – Búginnen bastap Qytaıdyń qaq ortasyndaǵy Sıan qalasynan Almatyǵa týrıstik poıyz qatynaıtyn bolady. Bul týraly QR Kólik mınıstrligi Temirjol jáne sý kóligi komıtetiniń tóraǵasy Jánibek Taıjanov aıtty.
— Búginnen bastap 7 maýsymǵa deıin Sıan–Almaty baǵytyndaǵy jolaýshylar poıyzy iske qosylady. Bul poıyz Qazaqstan Respýblıkasyndaǵy Qytaı týrızm jyly aıasynda uıymdastyrylyp otyr, - dedi ol OKQ alańynda Týrıstik jáne halyqaralyq baǵyttaǵy jolaýshylar poıyzy týraly baıandamasynda.
Sondaı-aq komıtet basshysy bıyl da Almatydan Buharaǵa deıin týrıstik poıyz qatynaıtynyn aıtty.
— 2024 jylǵy qarashadan bastap Almaty–Túrkistan–Tashkent–Samarqan–Buhara baǵyty boıynsha «Jibek joly» jáne «Keruen Express» týrıstik poıyzdary iske qosyldy. Atalǵan poıyzdar 2024 jyldyń qarasha aıynan bastap 5 ret qatynady. Týrıstik agenttikterdiń ótinishteri boıynsha bul poıyzdardyń qatynaýy ári qaraı jalǵastyrylady, - dep atap ótti.
Odan bólek Jánibek Taıjanov ishki baǵytta 1 naýryzdan beri Balqash–Almaty baǵyty boıynsha turaqty poıyz qatynap turǵanyn eske saldy.
Buǵan deıin bıyl jazda Balqashtyń kýrorttyq aımaǵyna Astana, Semeı, Almaty qalalary jáne Qaraǵandy oblysynan (Moıynty, Saıaq) 10 temirjol marshrýty uıymdastyrylatynyn jazǵan edik.