Búginnen bastap qoqys satyp alatyn portalǵa tirkelý bastalady
ASTANA. KAZINFORM – Búginnen bastap qaldyqty qaıta óńdeýshilerge «elektrondy aýktsıon» prıntsıpimen qaldyq satýǵa múmkindik beretin aqparattyq júıege tirkelý bastalady.
Bul týraly «Jasyl damý» AQ basqarma tóraǵasy Erjan Sársenbaı ortalyq kommýnıkatsııalar qyzmetinde ótken brıfıngide málim etti.
«Búginnen bastap EcoQoldau avtomattandyrylǵan júıesi iske qosyldy. Jaqyn arada óńirlerdi materıaldyq-tehnıkalyq jaraqtandyrýǵa baǵyttalǵan jobalardy qarjylandyrý bastalady. EcoQoldau qaldyqtardy basqarý salasyndaǵy bıznes protsesterdi jeńildetip, eldegi ekologııalyq ahýalǵa oń áser etedi. 2021 jyly osy maqsatta 6,1 mlrd teńge tólendi. Onyń ishinde avtokomponetterdi qaıta óńdeýge 1,1 mlrd teńge, plastık, karton, shyny qaptamalardy qaıta óńdeýge 5 mlrd teńge tólendi», — dedi «Jasyl damý» AQ basshysy.
Sondaı-aq, ol EcoQoldau avtomattandyrylǵan júıesi arqyly qaldyq satý qalaı iske asatynyn túsindirdi.
«Birinshi jeke nemese zady tulǵa mobıldi qosymsha arqyly júıege tirkelip, jınalǵan qaldyqty satatyny týraly ótinim qaldyrady. Odan ári qaldyq jınaýshylar óz baǵalaryn usynyp, qaldyq ıesinen ony satyp alady. Jınaýshylar aı boıy jınaǵan qaldyq týraly derekti EcoQoldau júıesine engizip, habarlandyrý jarııalap otyrady. Jınaýshylar kóńilinen shyqqan satyp alýshymen kelisimshart jasaıdy. Odan keıin jınaýshy qaldyqty tasymaldaý jóninde habarlandyrý shyǵarady. Al ony kimniń tasıtynyn qaldyq ıesi derbes tańdap, qaldyqty qaıta óńdeýshige deıin jetkizý týraly kelisimshart jasasady. Qaıta óńdeýshi senimdi salmaq ólsheıtin qural arqyly satyp alynǵan qaldyqty qabyldap, tıisti aktige qol qoıady. Osydan keıin qaldyqty satýshy men qaıta óńdeýshi operatorǵa esep jiberedi. Sol eseptiń negizinde tólem jasalady. Qaldyq satýshy aıaqtalǵan aıdyń esebin kelesi aıdyń 15-ine deıin, qaldyq óńdeýshiler tolǵan toqsannyń esebin kelesi aıdyń 25-ine deıin jiberýi kerek. Bul protsess aqparattyq júıege tirkelgen barlyq paıdalanýshylarǵa qoljetimdi. Baǵa saıasatyn naryqtyq qatynas retteıdi», — dedi Erjan Sársenbaı.
