Búginnen bastap qazaqstandyqtar shetelden júk kólikteri men avtobýstardy kirgize almaıdy

ASTANA. KAZINFORM — Búgin Eýrazııalyq ekonomıkalyq keńestiń Eýrazııalyq ekonomıkalyq odaq aýmaǵyna syrttan kólik ákelý tártibin ózgertýge arnalǵan sheshimi kúshine endi. 

Qazaqstan EAEO-ǵa múshe bolǵandyqtan atalǵan sheshim Qazaqstanǵa kólik ákelý tártibin de ózgertedi degen sóz. Ol qujat boıynsha qazaqstandyqtar jeke qajettiligi úshin myna kólik túrlerin ǵana ákele alady:

— Jeńil kólik (medıtsınalyq maqsatqa arnalǵan kólikten basqa) jáne EAEO syrtqy ekonomıkalyq qyzmeti taýar nomenklatýrasynyń 8703-taýar pozıtsııasyna jatatyn basqa motorly kólikter.

— Taýar nomenklatýrasynyń 8703-taýar pozıtsııasyna jatatyn kvadrotsıkl, qarda júretin kólik, batpaqta júretin kólikter, jol talǵamaıtyn motokólik jáne jalpy jolǵa arnalmaǵan basqa da motorly kólik quraldary (jalpy jolǵa arnalmaǵan jarys kólikterinen basqa).

— Taýar nomenklatýrasynyń 8711-taýar pozıtsııasyna jatatyn mototsıkl, moped, motoroller.

— Taýar nomenklatýrasynyń 8702-taýar pozıtsııasyna jatatyn 12-den artyq (júrgizýshini qosqanda) adam tasymaldaýǵa arnalmaǵan motorly kólik, taýar nomenklatýrasynyń 8704 21, 8704 31, 8704 41 jáne 8704 51 sýbpozıtsııalaryna jatatyn júk tasymaldaýǵa (joǵary radıoaktıvti materıaldardy tasıtyn kólikterden basqa) arnalǵan tolyq salmaǵy 5 tonnadan aspaıtyn motorly kólik.

Basqasha aıtsaq, 20 qazannan bastap avtobýstar men júk kólikterin EAEO aýmaǵyna zańdy tulǵalar ǵana ımporttaı alady.

Jolaýshy syıymdylyǵy 12 adamnan asatyn avtobýstar men júk tasymaldaý salmaǵy 5 tonnadan artyq kólikter EEK bekitken tizimge kirmeı qalǵandyqtan, olarǵa berilmeıdi. Demek, olardy kedende rásimdep, elektrondyq pasport alýǵa, ýtıl alym tóleýge jáne tirkeýge ruqsat joq.

Eske salsaq, Prezıdent Qasym-Jomart Toqaev bıylǵy Joldaýynda Qazaqstan kásipkerleri EAEO aıasynda tıimsiz jaǵdaılarǵa tap bolyp, odaq elderdegi básekelesterine ese jiberip jatqanyn málim etken bolatyn.