Búginnen bastap Qazaqstanda balalardy otbasyna ornalastyrýdyń jańa túri engizildi

ASTANA. KAZINFORM - 1 shildeden bastap Qazaqstanda balalardy otbasyna ornalastyrýdyń jańa túri – kásibı qabyldaýshy otbasy engiziledi. Bul – ata-anasynyń qamqorlyǵynsyz qalǵan balalar úshin qaýipsiz ári jaıly úı jaǵdaıyn qamtamasyz etýge baǵyttalǵan ýaqytsha, biraq mańyzdy qadam.

Kásibı qabyldaýshy otbasylar bir ýaqytta tórt balaǵa deıin tárbıeleýge múmkindik alady. Mundaı otbasyǵa bala qabyldamas buryn úmitkerler mindetti túrde arnaıy daıyndyqtan ótýi tıis. Oqytý jetim balalarǵa arnalǵan memlekettik mekemelerde jáne balalardy otbasyna qabyldaǵysy keletin adamdardy oqytýǵa quqyǵy bar akkredıttelgen uıymdarda uıymdastyrylady.

Kandıdattardy bekitý týraly túpkilikti sheshimdi qamqorshylyq jáne qorǵanshylyq organdary qabyldaıdy. Bul sheshim usynylǵan qujattardyń tolyqtyǵy men zań talaptaryna sáıkes qabyldanady.

«Qazirgi ýaqytta qamqorshylyq organdary kásibı qabyldaýshy ata-analardy irikteý jáne daıarlaý jumystaryn belsendi túrde júrgizip jatyr. Jańa formattyń negizgi artyqshylyǵy – balalar ınternat mekemelerine emes, birden otbasylarǵa ornalastyrylady. Bul — balanyń psıhologııalyq kúızeliske túsý qaýpin azaıtyp, alǵashqy kúnderden-aq ony meıirim men jylylyqqa toly turaqty otbasylyq ortaǵa beıimdeýge múmkindik beredi», – dep atap ótti QR Oqý-aǵartý mınıstrligi Balalardyń quqyqtaryn qorǵaý komıtetiniń tóraıymy Nasymjan Ospanova.

Árbir kásibı qabyldaýshy tárbıeshige balaǵa jumsalatyn aı saıynǵy járdemaqy, sondaı-aq tárbıeleý qyzmeti úshin eńbekaqy tólenetin bolady.

Aıta keteıik, qazirgi tańda elimizde balalardy otbasyna ornalastyrýdyń tórt túri bar: asyrap alý, qamqorshylyq, patronat, qabyldaýshy otbasy.

Buǵan deıin bala asyrap alǵysy keletin azamattar qandaı qujat jınaýy tıis ekenin jazǵanbyz.