Búginnen bastap Qazaqstan men Qytaı arasyndaǵy vızasyz rejım týraly kelisim kúshine endi

Búgin,10 qarashada Qazaqstan men Qytaı Halyq Respýblıkasynyń Úkimeti arasyndaǵy vızalyq talaptardan ózara bosatý týraly kelisim kúshine endi, dep habarlaıdy Kazinform. 

Syrtqy ister mınıstrligi baspasóz qyzmetiniń málimetinshe, osy kelisimniń 1-shi babyna sáıkes eki eldiń azamattary jeke isterdi, týrızmdi, em qabyldaýdy, halyqaralyq tasymaldardy, tranzıttik, sondaı-aq iskerlik maqsattardy júzege asyrý úshin vızalyq talaptardan bosatylady. Osy rette azamattardyń eki memleket aýmaǵynda bolý merzimi kúntizbelik 30 (otyz) kúnnen aspaıtyn merzimdegi kezeńge, al kúntizbelik 180 (júz seksen) kún ishinde jıyntyǵynda kúntizbelik 90 (toqsan) kúnnen aspaýy qajet.

Azamattarda 30 kúnnen artyq bolý qajettiligi bolǵan jaǵdaıda, tıisti sanattaǵy kirý vızasyn aldyn ala rásimdeý qajet. Vızasyz rejım jumysqa ornalasýǵa, oqýǵa jáne mıssıonerlik qyzmet jasaýǵa quqyq bermeıdi. Joǵaryda atalǵan kelisim QHR Gonkong jáne Makao arnaıy ákimshilik aýdandarynyń aýmaǵyna barýǵa qoldanylmaıtynyn atap ótý kerek. Qazaqstan azamattary Gonkongqa vızasyz 14 (on tórt) kúnnen aspaıtyn merzimge bara alady, al Makaoǵa barý úshin vıza rásimdeý qajet.

Qazaqstandyqtar 34 elge vızasyz bara alady.

2023 jylǵy 17 mamyrda Sıan qalasynda (QHR) qol qoıylǵan Qazaqstan Respýblıkasynyń Úkimeti men Qytaı Halyq Respýblıkasynyń Úkimeti arasyndaǵy vızalyq talaptardan ózara bosatý týraly kelisim 2023 jylǵy 10 qarashada kúshine enetini aıtylǵan bolatyn.

Buǵan deıin Kazakh Toursim ulttyq kompanııasynyń basqarýshy dırektory Danıel Serjanuly vızalardyń alynýy Qazaqstan týrızmine qalaı áser etetinin aıtty.

Parlament Májilisiniń depýtaty Aıgúl Quspan Qytaı kóp elmen vızasyz rejım ornata bermeıtinin jetkizdi.