Búginnen bastap Qazaqstan aýmaǵynan úshinshi elderge kartop shyǵarýǵa tyıym salyndy
ASTANA. KAZINFORM — Qazirgi ýaqytta kórshiles elder tarapynan qazaqstandyq kartopqa joǵary suranys saqtalýda, dep jazady AShM.
2024 jyldyń qorytyndysy boıynsha 605 myń tonnaǵa jýyq kartop eksporttalǵan, bul 2023 jylǵy kórsetkishten (411 myń tonna) 1,5 ese artyq. Bul kórsetkish sońǵy 10 jyldaǵy rekordtyq deńgeıge jetip, ishki naryqtaǵy baǵalarǵa aıtarlyqtaı áser etken.
- Osyǵan baılanysty, naryqtaǵy jaǵdaıdy turaqtandyrý jáne baǵanyń ósýine jol bermeý maqsatynda 2025 jylǵy 18 qańtarda ótken Syrtqy saýda saıasaty jáne halyqaralyq ekonomıkalyq uıymdarǵa qatysý máseleleri jónindegi vedomstvoaralyq komıssııanyń sheshimimen Qazaqstan Respýblıkasynyń aýmaǵynan barlyq kólik túrlerimen kartopty úshinshi elderge eksporttaýǵa, Eýrazııalyq ekonomıkalyq odaq elderinen basqa, 6 aı merzimge shekteý engizildi, - delingen aqparatta.
Vedomstvoaralyq komıssııanyń sheshimi negizinde 2025 jylǵy 27 qańtardaǵy №26 QR Aýyl sharýashylyǵy mınıstriniń «Qazaqstan Respýblıkasynyń aýmaǵynan kartopty eksporttaý máseleleri týraly» buıryǵymen úshinshi elderge barlyq kólik túrlerimen kartopty shyǵarýǵa tyıym salyndy.
Qabyldanǵan sharalar kartop baǵasynyń alypsatarlyq jolmen ósýine jáne naryq qatysýshylary tarapynan oryn alýy múmkin spekýlıatıvti áreketterge jol bermeýge múmkindik beredi.
Aıta keteıik, buǵan deıin Qazaqstan qalalarynda kartop baǵasy qansha turatynyn jazǵanbyz.