Búginnen bastap Air Astana ushaqtarymen eresekterdiń qaraýynsyz ushatyn balalar aqy tóleıdi

ASTANA. KAZINFORM – Endi balalardy ushaqqa jalǵyz otyrǵyzatyn bolsańyz, aqy tóleýge týra keledi. «Air Astana» áýe kompanııasy búginnen bastap osyndaı erejeniń engizilgenin habarlady.

«Eresektersiz jolǵa shyǵatyn 6 jastan 15 jasqa deıingi balalardy tasymaldaý úshin arnaıy alym tóleý kerek. Onyń quny bir jaǵyna — 9 750 teńge nemese 20 AQSh dollary», — delingen habarlamada. 

Áýe kompanııasynyń málimetinshe, bul qarjyǵa bort qyzmetkerleri saparlaıtyn balany áýejaıǵa tirkelgen sátten bastap baratyn jerdegi jaýapty tulǵamen kezdesýine deıin alyp júredi. Kishkentaı jolaýshylar ushaqqa birinshi bolyp minip, sońǵy qatarda otyrady ári olardy ekıpaj baqylaıdy.

Zańdy ókilder balany stıýardessalarǵa tapsyrý úshin áýejaıǵa ushý ýaqytynan keminde 1,5-2 saǵat buryn kelýi kerek. Balalardy ushaqpen jalǵyz tasymaldaý kezinde elektrondyq qujattardy qoldanýǵa ruqsat etilmeıdi.