Búgingi veb-sheberler meıramyn qazaqstandyq baǵdarlamashylar atap óte me
ÓSKEMEN. KAZINFORM – Búgin álem boıynsha veb-sheberler meıramy atap ótilip jatyr. Kazinform tilshisi qazaqstandyqtar baǵdarlamashylardyń bul kúndi atap ótetinin-ótpeıtinin bilip kórdi.
Veb-sheberler meıramyn atap ótý úshin osy kúnniń tańdalýy tegin emes. Naqtylap qarasa, 4.04 tsıfrlary 404 sanyn (ınternet-paraqshanyń tabylmaýyn kórsetetin) eske túsiredi.
Veb-sheber nemese saıttyń «basqarýshysy» veb-saıt jáne ınternettegi korporatıvtik qosymshany jasaýmen aınalysady.
Jalpy bul meıramdy tek olar emes, baǵdarlamashylar, veb-dızaınerler, SEO-mamandary jáne jumysy saıtty qurýǵa jáne damytýǵa qatysty basqa da mamandar atap ótedi. Álemde osy kúni veb-jobalardaǵy jańa tehnologııalardy qoldanýǵa arnalǵan jınalystar men konferentsııalar uıymdastyrylyp jatady. Áriptester áleýmettik jelide bir-birin quttyqtap, paıdaly keńesterimen bólisedi.
Osy rette, «Qazaqstandyq baǵdarlamashylar veb-sheberler meıramyn atap óte me?» degen suraqtyń jaýabyn izdep kórdik.
- Bul meıram týraly birinshi ret estip turmyn. Dese de Qazaqstanda IT salasyna qatysty mereke kóp qoı. Sondyqtan osy saladaǵylarǵa «bizde mereke joq» dep ókpe-naz aıtqan orynsyz bolar. Al eger 4 sáýirdi resmı túrde kúntizbege engizip, atap ótip jatsa qarsy emespin. Sebebi qazir ІT-mamandarsyz, veb-sheberlersiz bir isti júzege asyrý qıyn. Mysaly, Egov qosymshasyn alaıyq. Sonyń bir ózi qanshama qazaqstandyqtyń júgin jeńildetip, máselesin sheship otyr, - deıdi almatylyq IT maman Meıirjan Áýelhanuly.
Al óskemendik saıt jasaýshy Medeý Demesinov veb-sheberler meıramyn bilse de toılamaıtynyn jetkizdi.
- Iá. Osyndaı meıram bar ekenin bilemin. Biraq ony atap ótip kórmeppin. Bizde bul sala sheteldegideı keń damı qoıǵan joq. Bálkim, sodan da shyǵar dep oılaımyn. Eger ákimdik nemese qandaı da bir qoǵamdyq uıymdar tarapynan meıramǵa qatysty shara ótkizip jatsa, qýana-qýana barar edim, - deıdi ol.
Eske salsaq, buǵan deıin 7 myńnan asa qazaqstandyq júrgizýshi kýáligin eki batyrmany basý arqyly aýystyrǵany jaıly jazǵanbyz.