Búgingi referendýmda halyq memleket bolashaǵyna sheshim qabyldap jatyr – Erlan Qoshanov
ASTANA. KAZINFORM – Májilis tóraǵasy Erlan Qoshanov elordadaǵy №163 referendým ýchaskesinde daýys berdi, dep habarlaıdy QazAqparat tilshisi.
Palata spıkeri Erlan Qoshanov «Qazaqstan temir joly» ǵımaratyndaǵy saılaý ýchaskesine kelip, elorda turǵyndarymen birge Qazaqstanda atom elektr stantsııasyn salý máselesi boıynsha ótip jatqan respýblıkalyq referendýmda óz tańdaýyn jasady.
«Búgingi referendým aıasynda merekelik kóńil-kúıdemin dep aıta alamyn. Sebebi memleketimiz úshin óte mańyzdy kún. Atap aıtqanda, elimizdiń bolashaǵyna qatysty óte iri sheshim jasalyp jatyr. Eń negizgisi – bul sheshimdi halyq qabyldap otyr. Osyǵan deıin Konstıtýtsııalyq reformany qabyldadyq. Bul reformanyń negizgi maqsaty qandaı? Osy turǵyda ár adamnyń memlekettiń saıası ómirine emin-erkin aralasýyna barynsha ekpin qoıyldy. Búgin sonyń naqty kórinisin baıqap otyrmyz. Barlyq óńirde ár azamatymyz óz daýystaryn berip jatyr. Ár óńirden kelip jetqan aqparatqa qaraǵanda, belsendilik óte joǵary. Meniń oıymsha, memleketimizdiń bolashaǵy úshin búgin halyq durys sheshim qabyldaıdy», - dedi Májilis tóraǵasy.
№163 referendým ýchaskesi komıssııasynyń tóraǵasy Zamır Serikovtiń aıtýynsha, daýys berýge turǵyndar belsendi túrde qatysyp jatyr.
«Ýchaske óz jumysyn tańǵy saǵat 7:00-de bastady. Sol sátte bizde 10 baıqaýshy boldy, onyń ekeýi - halyqaralyq delegatsııa ókili. Olardyń kózinshe barlyq rásimdi zańnamaǵa sáıkes bastadyq. Ýchaskede 2 545 adam daýys berýshi retinde tirkelgen. Referendýmǵa halyqtyń kelýi qarqynyn jaqsy dep baǵalap otyrmyz. Tańerteń erte kelgen qart adamdar men ómirinde alǵash daýys berýge qatysyp jatqan jastarǵa syılyqtar berdik», - dedi Z. Serikov.
Eske salaıyq, búgin qazaqstandyqtar atom elektr stantsııasyn salý máselesi boıynsha referendýmda daýys beredi.
El boıynsha 10 249 referendým ýchaskesinde daýys berý bastaldy.
