Búginde Qazaqstan teńizge shyǵa almaıtyn el sanatyna jatpaıdy — BUU Bas hatshysy
ALMATY. KAZINFORM — Antonıý Gýterrısh barlyq qatysýshyǵa yqylas tanytyp, atalǵan Ortalyqty ashý arqyly Ornyqty damý maqsattaryna qol jetkizý jolynda óńir úshin jańa kezeńniń bastalǵanyn aıtty
— Bul ortaq basymdyqtar men birlesken sheshimderge negizdelgen Ortalyq Azııadaǵy yntymaqtastyqtyń jańa dáýirin bildiredi. Atalǵan Ortalyq aımaq kóshbasshylary arasyndaǵy berik baılanystardyń jan-jaqty ekonomıkalyq ıntegratsııaǵa qalaı ulasatynyn kórsetetindeı áleýetke ıe. Men Prezıdent Toqaevtyń sarabdal saıasaty men kóshbasshylyǵyn joǵary baǵalaımyn. Onyń bastamalary álemdik tártipte róli artyp kele jatqan Ortalyq Azııanyń jańa kelbetin qalyptastyrýǵa yqpal etýde, — dedi Bas hatshy.
Sondaı-aq Antonıý Gýterrısh Túrkimenstanda ótetin teńizge shyǵar joly joq damýshy elderge arnalǵan BUU-nyń úshinshi konferentsııasy qarsańynda Almatyǵa kelgenine qýanyshty ekenin jetkizdi.
— Ortalyq osyndaı memleketter úshin is-qımyl baǵdarlamasyn júzege asyrýda jańashyl tásil usyna alady. Búginde Qazaqstan teńizge shyǵa almaıtyn el sanatyna jatpaıdy. Biz muny senimdi túrde aıta alamyz. Avtokólik jáne temir jol dálizderi, talshyqty-optıkalyq jelileri arqasynda Qazaqstan jahandyq saýda júıesiniń, álemdik logıstıkanyń, kólik jáne telekommýnıkatsııanyń ortalyǵyna aınaldy. Sizderdiń elderińiz shyn máninde Shyǵys pen Batys, Soltústik pen Ońtústik arasyndaǵy kópir bolyp otyr, — dedi Antonıý Gýterrısh.
Bas hatshy sóziniń sońynda Qazaqstannyń ishki saıası baǵdary men syrtqy saıasatyna joǵary baǵa berdi.
— Qazaqstanǵa shyn júrekten tántimin. Men úshin Qazaqstan –danalyqtyń sımvoly, halyqtar arasyna dáneker bolyp, beıbitshilikke úndeıtin el. Bul — túrli etnos pen din ókilderi bas qosyp, ortaq keleshekke aparatyn joldy birge izdeıtin meken. Qazaqstannyń ıadrolyq qarýdan bas tartqanyn eshqashan umytpaımyn. Osy sheshimniń nátıjesinde Sizderdiń elderińiz beıbitshilik pen qarýsyzdanýdyń sımvolyna aınaldy. Búgingi tańda bul óte ózekti. Qazaqstan árdaıym parasattylyq tanytqan ári sol bıiginde qalady. Ókinishke qaraı, qazirgi álemge osyndaı baıypty ustanym jetpeı tur, — dedi Antonıý Gýterrısh.
Eske sala keteıik, búgin Prezıdent pen Antonıý Gýterrısh Almaty qalasyndaǵy BUU óńirlik ortalyǵyna bardy.