Qazaq-qytaı áriptestigi buryn-sońdy bolmaǵan deńgeıge jetti - Bektenov
ASTANA. KAZINFORM – Qazaqstan Respýblıkasynyń Premer-mınıstri Oljas Bektenov Qytaı Halyq Respýblıkasynyń Gonkong Arnaıy ákimshilik aýdany ákimshiliginiń Basshysy Djon Lımen kezdesý ótkizdi.
Kelissózder barysynda saýda-ekonomıkalyq yntymaqtastyqty arttyrý perspektıvalary talqylandy. Atap aıtqanda, kóliktik-logıstıkalyq marshrýttardy damytý, ınvestıtsııalyq yntymaqtastyqty keńeıtý tetikteri, sondaı-aq tsıfrlandyrý, bilim berý jáne týrızm salasyndaǵy birlesken jobalar qaraldy.
«Qytaımen ózara tıimdi qarym-qatynasty damytý – Qazaqstannyń syrtqy saıasatynyń basty basymdyqtarynyń biri. Búginde qazaq-qytaı áriptestigi buryn-sońdy bolmaǵan deńgeıge jetti jáne tatý kórshiliktiń, ózara senimniń jáne uzaq merzimdi yntymaqtastyqtyń úlgisin kórsetip otyr. Ótken jyl saıası dıalogtyń qarqyndylyǵy turǵysynan erekshe mańyzdy boldy. Memleket basshylary deńgeıindegi ózara saparlar men kezdesýler ekijaqty yntymaqtastyqtyń barlyq spektrine qýatty serpin berdi», - dep atap ótti Oljas Bektenov.
Gonkong AÁA ákimshiliginiń basshysy Djon Lı ótkizilgen kezdesýler men kelissózderdiń nátıjeleri Qazaqstanmen odan ári ózara is-qımyldyń jańa kókjıekterin rastaǵanyn atap ótti. Onyń aıtýynsha, Gonkong pen materıktik Qytaıdyń isker toptarynyń ókilderi Qazaqstandy yntymaqtastyqty damytý jáne Ortalyq Azııa naryǵyna shyǵý alańy retinde qarastyrady.
«Biz sizdiń Prezıdentińizdiń basshylyǵymen qysqa ýaqyt ishinde qol jetkizgen áserli, turaqty ekonomıkalyq ósýdi kórip otyrmyz. Qazaqstan úlken múmkindikterge, al Qytaımen qarym-qatynas strategııalyq jáne uzaq merzimdi sıpatqa ıe. Osy sapardyń qorytyndysy odan arǵy yntymaqtastyqtyń eleýli áleýetine jáne "habtan habqa" áriptestik modelin damytýdyń qolaıly perspektıvalaryna degen senimimizdi odan ári nyǵaıtty. Sizdiń elińiz Azııa men Eýropa arasyndaǵy negizgi kólik-logıstıkalyq marshrýttardyń qıylysynda bola otyryp, Ortalyq Azııada strategııalyq orynǵa ıe. Bizde tıimdi yntymaqtastyq úshin kóptegen salalar bar ekenine senimdimin», - dedi Djon Lı.
Qytaı – Qazaqstannyń negizgi saýda seriktesteriniń biri: ótken jyldyń qorytyndysy boıynsha eki el arasyndaǵy ózara saýda $48,7 mlrd-qa jetti. Qazaqstan men Gonkong arasyndaǵy ekijaqty taýar aınalymy 40%-ǵa ósip, $180 mln-dy qurady. Qazaqstanda óńdeýshi ónerkásip pen ozyq tehnologııalardy basymdyqpen damytýǵa baǵyttalǵan anaǵurlym qolaıly ınvestıtsııalyq orta qurylǵan, ol únemi damyp otyrady.
Aıta keteıik, Qazaqstan-Qytaı tsıfrlyq astyq saýdasy platformasynda alǵashqy mámile tirkeldi.
