Búgin jeti oblysta úsik júredi — Qazgıdromet

ASTANA. KAZINFORM — «Qazgıdromet» RMK el aýmaǵynda 26 mamyrda bolatyn qaýipti meteorologııalyq qubylystarǵa boljam jasady.

Derekke qaraǵanda, respýblıkanyń basym bóligine atmosferalyq frontaldy bólimder áser etedi. Sondyqtan aýa raıynyń turaqsyz sıpaty kútiledi, naızaǵaı oınap, jańbyr jaýady, eldiń shyǵysynda, ońtústik-shyǵysynda qatty jańbyr jaýýy boljanady.

Ortalyqta, shyǵysta, ońtústik-shyǵysta burshaq jaýyp, daýyl turady.

Tek batysta, soltústik-batysta, eldiń ońtústiginde jaýyn-shashynsyz aýa raıy kútiledi.

Respýblıka boıynsha jeldiń kúsheıýi múmkin, QR-nyń ońtústiginde, ońtústik-shyǵysynda shańdy daýyl turyp, túngi jáne tańerteńgi saǵattarda tuman túsedi.

— Túnde Soltústik Qazaqstan, Qostanaı oblystarynda, Aqtóbe oblysynyń soltústiginde, shyǵysynda, Aqmola oblysynyń batysynda, soltústiginde, shyǵysynda, Pavlodar, Qaraǵandy oblystarynyń batysynda, soltústiginde, Ulytaý oblysynyń soltústiginde 1-6 gradýsqa deıin úsik júredi, — dep jazylǵan boljamda.

Jetisý oblysynyń soltústiginde, ortalyǵynda, Mańǵystaý oblysynyń batysynda, Aqtóbe oblysynyń batysynda, Pavlodar oblysynyń shyǵysynda, Jambyl oblysynyń soltústiginde, ońtústiginde, Batys Qazaqstan oblysynyń shyǵysynda, Atyraý oblysynyń soltústiginde, shyǵysynda, Túrkistan oblysynyń ońtústiginde, Almaty oblysynyń ortalyǵynda, Abaı oblysynyń ońtústik-shyǵysynda joǵary órt qaýpi kútiledi.

Qyzylorda oblysynda, Túrkistan oblysynyń soltústiginde, shóldi jáne taý bókteri aýdandarynda, Jambyl oblysynyń batysynda, shyǵysynda, Aqtóbe oblysynyń ońtústik-shyǵysynda, Atyraý oblysynyń ońtústiginde, batysynda, Almaty oblysynyń batysynda, soltústiginde, Pavlodar oblysynyń batysynda, ońtústiginde, Shyǵys Qazaqstan oblysynyń ońtústik-shyǵysynda, Jetisý oblysynyń shyǵysynda, Abaı oblysynyń ońtústiginde, Ulytaý oblysynyń ońtústiginde tótenshe órt qaýpi kútiledi.

Aıta keteıik, Qazaqstannyń barlyq aýmaǵynda daýyldy eskertý jarııalandy.