Búgin Jánibek Álimhanulynyń dopıng daýy boıynsha naqty sheshim shyǵady

ASTANA. KAZINFORM - Búgin qazaqstandyq kásipqoı boksshy Jánibek Álimhanulynyń dopıng daýy boıynsha naqty sheshim shyǵady.

Bul maqsatta mamandar V synamasyn sarapqa salyp, ol boıynsha naqty jaýabyn aıtady.

Synamada otandasymyzdyń tyıym salynǵan preparat qoldanǵany anyqtalsa, kásipqoı mansabyna baılanysty suraqtar týyndaıdy. Eger ol jalǵan bolyp shyqsa, mansabyn qaıta jalǵastyrýǵa múmkindik alady.

Aıta ketsek, WBO jáne IBF tujyrymdary boıynsha orta salmaqtaǵy álem chempıony Jánibek Álimhanuly jeltoqsan aıyndaǵy kezekti jekpe-jegi aldyndaǵy dopıng testinen ótpeı qaldy.

Ol jóninde sportshynyń ózi pikirin bildirdi.

- Men árqashan taza sportty qoldaımyn. Muny jaqsy bilesizder. Men taza sportty nasıhattap júrgenimdi de bilesizder, - dedi ol.

Osyǵan baılanysty orta salmaqta WBO jáne IBF tujyrymdary boıynsha álem chempıony bolyp turǵan Jánibek Álimhanuly (17-0, 12 KO) men WBA chempıony Erıslandı Lara (31-3-3, 19 KO) arasyndaǵy jyldyń basty jekpe-jegi resmı túrde ótpeıtini belgili boldy.

Osyǵan baılanysty uıymdastyrýshylar Laraǵa basqa qarsylas taýyp úlgergen. Jekpe-jek toqtatylǵan soń, Laraǵa shuǵyl túrde jańa qarsylas belgilendi. Onyń ornyna venesýelalyq Iohan Gonsales (36-4, 34 KO) shyǵatyn boldy.