Búgin jańa Qurylys kodeksi kúshine enedi
ASTANA. KAZINFORM — Bıyl da el boıynsha 20 mıllıon sharshy metr turǵyn úıdi paıdalanýǵa beriledi. Bul týraly Úkimet otyrysynda Ónerkásip jáne qurylys mınıstri Ersaıyn Naǵaspaev málimdedi.
— Jyl basynan beri qurylys salasyndaǵy jumys kólemi shamamen 2,4 trıllıon teńge bolyp, 13,4% ósti. Oǵan qosa, 6.3 mıllıon sharshy metr turǵyn úı paıdalanýǵa berildi. Bul ótken jyldyń deńgeıinen 4,5% joǵary, — dedi Ersaıyn Naǵaspaev.
Salany damytýdaǵy mańyzdy qadam — jańa Qurylys kodeksiniń qabyldanýy boldy. Jańa Kodeksti iske asyrý sheńberinde 138 normatıvtik quqyqtyq akt qabyldandy. Osylaısha, qurylys qyzmeti rettelip, jańa júıeni qalyptastyrýǵa múmkindik beredi.
— 1 shildeden bastap kúshine enetin jańa Kodekstiń normalary qurylys sapasy men qaýipsizdigin arttyryp, rásimderdi ashyq ári tıimdi etedi, ákimshilik kedergilerdi azaıtady jáne qurylys salasyna ınvestıtsııa tartýǵa yqpal etedi, — dep atap ótti mınıstr.
Memleket basshysynyń tapsyrmasyna sáıkes «Energetıka jáne kommýnaldyq sektorlardy jańǵyrtý» ulttyq jobasy júzege asyrylyp jatyr. Sýmen jabdyqtaý jáne sý burý baǵytynda 223 joba-jumystary júrgizilýde.
— Qazirgi tańda 13 joba boıynsha qurylys-montaj jumystary bastaldy. Mınıstrlik jelisinde 2030 jylǵa deıin, jalpy quny 1 trıllıon teńgeden asatyn 5 myń shaqyrym sý qubyry jáne 2,8 myń shaqyrym sý burý jelisi jańǵyrtylady. Sonymen qatar, shamamen 800 mıllıard teńgege 45 káriz tazartý qurylysyn salý jáne qaıta jańǵyrtý josparlanyp otyr, — dedi Ersaıyn Naǵaspaev.
Keshe Parlament palatalarynyń birlesken otyrysynda Memleket basshysy Qasym-Jomart Toqaev energetıkalyq, ınjenerlik jáne kólik-logıstıkalyq ınfraqurylymdy tolyqqandy damytý qajettigin aıtqan edi.
Sonymen birge, Prezıdent Qazaqstandy úlken qurylys alańyna aınaldyrý qajettigin tapsyrdy.
