Búgin XXV qysqy Olımpıada oıyndarynyń jalaýy jelbireıdi
ASTANA. KAZINFORM – Búgin Italııanyń Mılan jáne Kortına-d’Ampetstso qalalarynda XXV qysqy Olımpıada oıyndary resmı túrde bastalady.
Oıyndardyń ashylý saltanaty jergilikti ýaqyt boıynsha saǵat 20:00-de Mılan qalasy men Lıvıno qar saıabaǵynda bir mezgilde ótedi. 2026 jylǵy Mılan-Kortına qysqy Olımpıadasynyń ashylý rásimine álemniń túkpir-túkpirinen kelgen sportshylar qatysyp, óz elderiniń týlaryn alyp shyǵady.
Qabyldaýshy tarap retinde Italııa 4 tý ustaýshyny usynbaq. Al sportshylar sherýi bir ýaqytta tórt túrli alańda uıymdastyrylady. Negizgi saltanatty kesh Mılan qalasyndaǵy áıgili «San-Sıro» olımpıadalyq stadıonynda ótedi. Sonymen qatar Predatstso, Lıvıno jáne Kortına-d’Ampetstso qalalarynda marapattaý rásimderi men sportshylar sherýi qatar júrgiziledi.
Qazaqstandyq kórermender saltanatty ashylý rásimin Astana ýaqyty boıynsha saǵat 23:50-den bastap Jibek Joly telearnasynyń tikeleı efırinen tamashalaı alady.
Mılan-Kortına-2026 qysqy Olımpıada oıyndarynyń ashylý saltanatyn «Balich Wonder Studio» stýdııasy uıymdastyryp otyr. Uıymdastyrýshylar bul aýqymdy halyqaralyq merekege jańa ári ınklıýzıvti format berýdi kózdeıtinin málimdedi.
Aıta ketsek, Italııa óz tarıhynda Olımpıada oıyndaryn tórtinshi ret qabyldamaq. Onyń ishinde bul – eldegi úshinshi qysqy Olımpıada. Buǵan deıin qysqy Olımpıada oıyndary Kortına-d’Ampetstso qalasynda (1956 jyl) jáne Týrınde (2006 jyl) ótken bolatyn.
Eske salaıyq, 2026 jylǵy Olımpıada oıyndary 6-22 aqpan aralyǵynda Italııanyń Mılan jáne Kortına-d’Ampetstso qalalarynda ótedi. Oǵan 90-nan astam elden shamamen 2 900-3 500 sportshy qatysady dep kútiledi. Baıraqty básekede 16 sport túri boıynsha 116 medal jıyntyǵy sarapqa salynady.
Baıraqty básekege Qazaqstan quramasynan 36 sportshy qatysady.
Sondaı-aq Qazaqstan quramasynyń ortasha jasy – 25 jas. Eń jas sportshy – frıstaıl-akrobatıkadan synǵa túsetin 16 jastaǵy Asan Asylhan. Al eń tájirıbeli sportshy – short-trekshi 33 jastaǵy Abzal Ájǵalıev. Quramadaǵy eń ataqty sportshy – frıstaıl-mogýldan baq synaıtyn ıÝlııa Galysheva.
Osyǵan deıin Qysqy Olımpıada oıyndary qandaı sport keshenderinde ótetini týraly jazǵan bolatynbyz.