Búgin voleıboldan Qazaqstan chempıonatynyń sheshýshi oıyndary bastalady

ASTANA. KAZINFORM — Búgin Aqtóbe qalasynda voleıboldan erlerdiń ulttyq lıga komandalary arasynda Qazaqstan chempıonaty pleı-off kezeńiniń alǵashqy oıyndary ótedi.

Ótken jyly Oralda fınalda Vıktor Kozık jattyqtyratyn «Jaıyq» klýby «Aqtóbeni» (bas bapkeri Sergeı Trıkoz) qapy qaldyryp, chempıon atanǵan edi.

Bıyl qos komanda jartylaı fınalda kezdesedi. Eki jeńiske qol jetkizgen bireýi fınalǵa joldama alady.

Ekinshi jartylaı fınalda turaqty chempıonatta kóshtiń aldyn bermegen, Marat Adryshev baptaıtyn «Jetisý» klýby «Atyraýmen» (bas jattyqtyrýshy Igor Nıkolchenko) oınaıdy.

Kókshetaý qalasynda qalǵan tórt klýb – «Býrevestnık» (Almaty), «Taraz», «Esil» jáne «Ushqyn-Kókshetaý» 5-8 oryndar úshin alańǵa shyǵady.

Eske sala keteıik, budan buryn áıelder arasynda «Jetisý» voleıbol klýbynyń onynshy ret Qazaqstan chempıony atanǵanyn jazǵan bolatynbyz.