Búgin úsh megapolıste aýa sapasy tómen bolady
ASTANA. KAZINFORM — «Qazgıdromet» RMK Qazaqstan qalalaryndaǵy aýa sapasyna qatysty boljamyn jarııalady.
— 2025 jylǵy 20 mamyrda Shymkent, Almaty qalalarynda, túnde Astana qalasynda aýanyń lastanýynyń qolaısyz meteorologııalyq jaǵdaılary kútiledi, — delingen habarlamada.
Qolaısyz meteorologııalyq jaǵdaılar — atmosferalyq aýanyń betki qabatynda zııandy (lastaýshy) zattardyń shoǵyrlanýyna yqpal etetin qysqamerzimdi meteofaktorlardyń (tymyq aýa raıy, jeńil jel, tuman, ınversııa) jıyntyǵy.
Qolaısyz meteorologııalyq jaǵdaı kezinde eldimekenderdegi atmosferalyq aýanyń sapasy nasharlaýy yqtımal.
Buǵan deıin elimizde jalǵyz qalada aýa sapasy nasharlaıtyny aıtyldy.
Sonymen qosa Óskemen qalasyndaǵy zaýyttardyń birinde aýaǵa taraıtyn zııandy qaldyqtar mólsheri ruqsat etilgen shekten asyp ketkeni anyqtaldy.