Búgin Úkimet otyrysynda qandaı máseleler kóterilmek
ASTANA. KAZINFORM – Búgin saǵat 10:00-de Úkimettiń kezekti otyrysy bastalady. Onda qazirgi jáne aldaǵy kezeńdegi mańyzdy 2 másele qaralady dep josparlanǵan.
Naqtyraq aıtqanda, Úkimet otyrysynyń kún tártibine myna máseleler shyǵarylyp otyr:
- 2025 jylǵy órtke qarsy maýsymǵa daıyndyq boıynsha qabyldanyp jatqan sharalar
- Sý tasqyny jaǵdaıy.
Atalǵan máseleler boıynsha Sý resýrstary jáne ırrıgatsııa, Ekologııa jáne tabıǵı resýrstar, Tótenshe jaǵdaılar mınıstrlikteriniń basshylyǵy, sondaı-aq birqatar oblystyń ákimi baıandama jasaıdy.
Máselen, Sý resýrstary jáne ırrıgatsııa mınıstri Úkimet otyrysynda sý tasqyny jaǵdaıyn baıandaıdy. Ol 2030 jylǵa deıingi sý resýrstaryn basqarý júıesin damytý tujyrymdamasy júzege asyrylyp jatqanyna toqtalmaq. Mınıstr baıandamasynda sý tasqyny kezeńine daıyndyq jumystary qalaı júrgizilgenin egjeı-tegjeıli aıtady. Sondaı-aq eldegi sý qoımalaryndaǵy sońǵy ahýal jaıly málimettermen bólisedi.
Eske sala ketesek, jaqynda Prezıdent Sý kodeksine qol qoıǵan bolatyn.
Al, Tótenshe jaǵdaılar vıtse-mınıstri órt qaýpi kezeńine daıyndyq máselesine, sý tasqynyna qatysty qazirgi ahýalǵa jan-jaqty toqtalady.
Ekologııa mınıstri «Qazgıdromettiń» aldyn ala boljamyna sáıkes, bıyl jaz ótken jyldarǵa qaraǵanda ystyq bolatynyn, osyǵan baılanysty oblys ákimdikteri orman órtteriniń aldyn alý boıynsha jan-jaqty sharalar qabyldap, orman sharýashylyqtarynyń kúshteri men quraldaryn tolyq jaýyngerlik daıyndyqqa keltirýi qajettigin basa aıtady.
Otyrys bitkennen keıin baspasóz máslıhaty ótkiziledi. Onda Sý resýrstary jáne ırrıgatsııa mınıstri Nurjan Nurjigitov, Ekologııa jáne tabıǵı resýrstar mınıstri Erlan Nysanbaev, Tótenshe jaǵdaılar vıtse-mınıstri Kegen Tursynbaev BAQ ókilderiniń saýaldaryna jaýap beredi.
Úkimet otyrysynyń tikeleı taratylymy PrimeMinister.kz saıtynda, YouTube resmı arnasynda, Facebook áleýmettik jelisinde, sondaı-aq UKIMET Telegram-kanalynda júredi.
Baspasóz konferentsııasynyń tikeleı taratylymyn YouTube resmı arnasynan jáne Facebook áleýmettik jelisinen kórýge bolady.
Eske salsaq, ótken aptada Úkimet otyrysynda týrızm salasyn damytý jáne tsıfrlandyrý máseleleri qaraldy. Otyrys barysynda Týrızm jáne sport mınıstri Erbol Myrzabosynov fermerlerge óz ýchaskelerinde agrotýrızmmen aınalysý quqyǵyn berý máselesin kóterdi. Sonymen qatar mınıstr Qazaqstanda qonaq úı júıesine reforma júrgiziletinin aıtty. Budan bólek Myrzabosynov elimizge kelgen sheteldik týrıster sanaǵy qalaı júrgiziletinin túsindirdi. Týrızm jáne sport mınıstri elimizge kelgen sheteldik týrısterdi taksı qyzmeti men valıýta aıyrbastaýda aldap ketý jaıttary baryn aıtty.
Al «Astana Kontsert» kompanııasynyń prodıýseri Málik Hasenov amerıkalyq aktrısa jáne ánshi Djennıfer Lopestiń Astanada ótetin kontsertinen qansha ekonomıkalyq paıda túsetinin aıtyp berdi.