Búgin túnde eki oblysta qar qursaýynda qalǵan 28 adam qutqaryldy
ASTANA. KAZINFORM – Búgin túnde Soltústik Qazaqstan oblysy Shal aqyn aýdanynda, Stýpınka men Semıpolka aýyldarynyń arasynda qar jaýyp, joldy basyp qalýy saldarynan birneshe avtokólik jolda qalyp qoıdy.
QR Tótenshe jaǵdaılar mınıstrligi baspasóz qyzmetiniń habarlaýynsha, oqıǵa ornyna jedel túrde TJM qutqarýshylary men jergilikti atqarýshy organdardyń ókilderi jetti. Qar qursaýynda qalǵan 7 jeńil avtokólik shyǵarylyp, olardyń ishinde bolǵan 20 adam, sonyń ishinde 3 bala qutqaryldy.
Kólikter tazartylǵan jol bóligine súırelip shyǵarylyp, adamdar jaqyn mańdaǵy eldi mekenderge deıin jetkizildi.
Zardap shekkender joq, eshkimge medıtsınalyq kómek qajet bolǵan joq.
Sondaı-aq Aqtóbe oblysynyń Áıteke bı aýdanynda, Aqtasty aýylynan 30 shaqyrym jerde eki jeńil avtokólik qar qursaýynda qalyp qoıdy.
Oqıǵa ornyna jedel jetken TJM qutqarýshylary jol talǵamaıtyn tehnıkanyń kómegimen 8 adamdy evakýatsııalap, olardy Tolybaı eldi mekenine jetkizdi. Zardap shekkender joq, medıtsınalyq kómek qajet bolǵan joq.
Aıta keteıik, búgin Qazgıdromet elimizdiń birqatar óńirinde aýa raıyna baılanysty eskertý jasady.