Jańa Konstıtýtsııa jastarǵa baǵdar beretin temirqazyq bolady — Toqaev
ASTANA. KAZINFORM — Prezıdent Qasym-Jomart Toqaev Konstıtýtsııany qabyldaýǵa arnalǵan saltanatty jıynǵa qatysyp, sóz sóıledi, dep habarlaıdy Aqordanyń baspasóz qyzmeti.
Prezıdenttiń sózinshe, bul referendým berekeli birlik pen yrysty yntymaǵymyzdyń taǵy bir ónegeli kórinisi jáne nyshany boldy.
— Biz halqymyzǵa tán naǵyz otanshyldyq rýhyn sezindik, olardyń rııasyz qoldaýyna kýá boldyq. Memleket taǵdyryna beı-jaı qaramaı, daýys berý naýqanyna atsalysqan barsha azamatqa zor alǵys aıtamyn! Ult múddesin tereń túsinip, Ata zańdy qoldap, daýys berýdi tarıhı mıssııa sanaǵan jurtshylyqqa shynaıy rızashylyǵymdy bildiremin. Bul oraıda, Pavlodar, Aqtóbe, Mańǵystaý, Jambyl, Túrkistan, Shyǵys Qazaqstan, Jetisý, Qyzylorda oblystarynyń jáne basqa da aımaqtardyń Ata zańdy maquldap, daýys bergen turǵyndaryna alǵysymdy aıtqym keledi, — dedi Toqaev.
Memleket basshysy sondaı-aq osy tusta Qazaqstan jastarynyń erekshe belsendi bolǵanyn atap ótti.
— Olar zańǵar jazýshy Ábish Kekilbaev aıtyp ketken «ulttyq jaýapkershiliktiń» ozyq úlgisin kórsetti. Muny zańdy qubylys dep aıtýǵa tolyq negiz bar. Óıtkeni jańa Konstıtýtsııa, eń aldymen, óskeleń urpaqtyń ıgiligi úshin qabyldanyp otyr. Buǵan deıin de aıttym, qazir de qaıtalaımyn: elimizdiń bolashaǵy — jastarymyzdyń qolynda! Memleket basshysy retinde men sizderge senemin, zor úmit artamyn! Jastarymyzdyń qarym-qabileti aıryqsha, talant-daryny mol, áleýeti zor, kúsh-jigeri myqty! Qazaqstandy álemdegi eń ozyq, damyǵan elderdiń qataryna qosatyn da — sizder! Buǵan esh kúmánim joq! Búgin tórge ozyp, tuǵyryna qonǵan jańa Halyq Konstıtýtsııasy sizderge baǵdar beretin temirqazyq bolady. Sebebi, bul — keler urpaqpen birge jasaı beretin qasıetti qujat, — dedi ol.
Aıta keteıik, Prezıdent QR Konstıtýtsııasyn iske asyrý jónindegi sharalar týraly Jarlyqqa qol qoıdy.
