Búgin tennısten AQSh ashyq chempıonaty bastalady

ASTANA. KAZINFORM — Búgin Nıý-Iork qalasynda tennısten AQSh ashyq birinshiligi bastalyp, bastapqy nátıjeler belgili bolady.

Bıylǵy sońǵy «Úlken dýlyǵa» týrnırine jekeleı synda Qazaqstannan bes tennısshi qatysyp, baq synaıdy.

Qazaqstannan alǵashqy bolyp kortqa shyqpaqshy bolyp otyrǵan álemniń 27-raketkasy Aleksandr Býblık dúnıejúzilik reıtıngide 77-orynda turǵan qytaılyq, 19 jastaǵy Tszıýnchen Shanmen sheberlik baıqasady.

Álemniń 60-raketkasy Aleksandr Shevchenko reıtıngide 80-satydaǵy germanııalyq Domınık Kepfermen kezdesedi.

Aıtýly dodaǵa irikteý saıystarynan keıin qosylǵan Tımofeı Skatovqa myqty qarsylas tap boldy. Ol álemniń 7-raketkasy, Polsha ókili Hýbert Hýrkachpen oınaıdy.

2023 jyly qazaqstandyq úsh tennısshi de alǵashqy básekesinde-aq jeńilip qalǵan eken.

Qazaqstannyń áıelder arasynda birinshi, álemniń 4-raketkasy Elena Rybakına reıtıngide 194-satydaǵy aýstralııalyq Destanı Aıavany synap kóredi.

Al reıtıngide 32-oryndaǵy ıÝlııa Pýtıntseva Chehııanyń 19 jastaǵy juldyzy Lında Noskovamen kortqa shyǵady.

L.Noskova naǵyz babynda deýge bolady. Lında keshe tańda Monterreı (Meksıka) WTA 500 jarysynyń fınalynda jańazelandııalyq Lýlý Sýndy 7:6 (8:6), 6:4 esebimen qapy qaldyryp, chempıon atandy. Osy tabysy arqasynda chehııalyq tennısshi 35-ten 25-satyǵa kóterilip, sporttyq jolynda rekordtyq nátıjege qol jetkizdi. Endi Noskovany Pýtıntseva toqtata ala ma, ony kort kórsetedi.

Ótken jyly E.Rybakına úshinshi, ıÝ.Pýtıntseva birinshi aınalymnan asa almaǵan bolatyn.

Sonymen qatar juptyq synda Aleksandr Nedovesov ekvadorlyq Gonsalo Eskobarmen, Anna Danılına reseılik Irına Hromachevamen, ıÝ.Pýtıntseva kanadalyq Leıla Fernandespen birge alamanǵa qosylady.

Eki aptaǵa sozylatyn AQSh ashyq chempıonaty 8 qyrkúıekte máresine jetedi.

Eske sala keteıik, budan buryn Anna Danılınanyń Meksıkada fınalǵa bir qadam jetpeı toqtaǵanyn jazǵan bolatynbyz.