Búgin Taraz qalasynda bokstan Qazaqstan chempıonaty bastalady
ASTANA. KAZINFORM - Búgin Taraz qalasynda bokstan 2026 jylǵy Qazaqstan chempıonaty jalaýyn kóteredi.
El birinshiligi 30 qazan-6 qarasha aralyǵynda Taraz qalasynda bolady. Aldymen 29 qazanda jerebe tartý rásimi ótkizilse, boksshylar 30 qazan -1 qarashada aldyn-ala jekpe-jekte synǵa túsedi. Odan keıin 2-3 qarashada shırek fınal bolsa, 4-5 qarashada jartylaı fınal belgilengen. Al 6 qarashada boksshylar fınalda bas júldeni sarapqa salady.
Erler básekesinde barlyq 20 óńir qatyssa, áıelder saıysynda 18 óńir (Aqtóbe men Abaı oblysynan basqa) synǵa túsedi.
Ótken jyly erler arasynda Túrkistan oblysy (3 altyn) top jarsa, áıelder arasynda negizgi básekelestik 3 megapolıstiń arasynda (2 altyn júldeden) ótken bolatyn.
Jazǵy Azııa oıyndarynyń chempıondary Tórehan Sabyrhan (70 keli), Aıbek Oralbaı (+90 keli), qola júldegerler Mahmýd Sabyrhan (55 keli), Alýa Balqybekova (51 keli), Natalıa Bogdanova (75 keli) jáne Qytaıdaǵy álem kýbogynyń jeńimpazy Sanjar Táshkenbaı, jaraqatyna baılanysty Nurbek Oralbaı qatyspaýǵa ruqsat aldy.
Al erler arasynda jankúıerler Orazbek Asylqulov (60 keli), Sabyrjan Aqqalyqov (80 keli), Ábilhan Amanqul (75 keli), Ertýǵan Zeınýllınov (65 keli), Saǵyndyq Toǵambaı (90 keli) syndy boksshylardyń jekpe-jegin tamashalaı alady. Áıelder arasynda Nazym Qyzaıbaı (54 keli),
Aıda Ábikeeva (65 keli), Lázzat Kúńgeıbaeva (80 keliden joǵary), Jaına Shekerbekova (54 keli), Karına Ibragımova (60 keli) sharshy alańǵa shyǵady.
Jekpe-jekter «Qazsport» telearnasy arqyly tikeleı efırde kórsetiledi.
Qazaqstan boks federatsııasynyń baspasóz qyzmeti málimetinshe, fınalǵa shyqqan sportshylar altyn tústes qolǵap jáne qorǵanys bas kıimimen sharshy alańda óner kórsetedi.
Eske salsaq, qazaqstandyq boksshy Jánibek Álimhanuly (17-0, 12 KO) ekinshi orta salmaqtaǵy chempıondyq belbeýlerdi biriktirý jekpe-jegin 2027 jylǵy mamyrda ótkizgisi keletinin málimdedi.
