Búgin sýperkýbokta «Qaırat» pen «Aqtóbe» kezdesedi

ASTANA. KAZINFORM - Búgin fýtboldan Qazaqstan sýperkýbogynda «Qaırat» (Almaty) pen «Aqtóbe» komandalary kezdesedi.

Oıyn elordadaǵy «Astana-arena» stadıonynda bolady.

Bul oıynda astanalyq Saıat Qarabaev bas tóreshi qyzmetin atqarady. Oǵan astanalyq Tımýr Tursymbaev pen Nurjan Júnisov kómekshilik jasaıdy. Qosalqy tóreshi de astanalyq Georgıı Jýkovskıı.

Qazirge deıin «Aqtóbe» 2008, 2010, 2014 jyldary úsh márte sýperkýbokty tóbesine kóterse, «Qaırat» 2016, 2017 jyldarda eki márte jeńimpaz atandy.

Aqtóbelik klýb ózi qatysqan sýperkýboktyń barlyǵynda jeńse, almatylyq komanda 2015, 2018, 2019, 2022 jyldary qarsylastaryna ese jiberip qoıdy.

Bıyl sýperkýbok oıyny óz tarıhynda 17 márte ótkizilmek. Qazirge deıin ol elimizdiń Almaty («Ortalyq»), Astana («Astana Arena»), Qostanaı («Tobyl Arena») jáne Túrkistan («Túrkistan-Arena») qalalarynda boldy.

Kezdesý Astana ýaqytymen saǵat 15.00-de bastalyp, «Qazsport» telearnasynan tikeleı efırde kórsetiledi.