Búgin Silk Way Star mega jobasy 12 eldiń telearnasynan kórsetiledi
ASTANA. KAZINFORM — Búgin saǵat 20:00-de Jibek Joly telearnasynda, Qytaıdyń CCTV-3 arnasynda jáne qatysýshy elderdiń ulttyq arnalarynda kópten kútken halyqaralyq megajoba – Silk Way Star kórermenge jol tartady. Óner báıgesinde 12 eldiń talantty ánshileri baq synaıdy. Olardyń ishinde Qytaı, Ońtústik Koreıa, Malaızııa elderinen kelgen talanttar bar.
Bıyl maýsym aıynda QR Prezıdentiniń Teleradıokesheni men Qytaı Medıa korporatsııasy (CMG) «Silk Way Star» halyqaralyq jobasy týraly kelisimge qol qoıdy. Bul qujat Qytaı Halyq Respýblıkasy Tóraǵasy Sı Tszınpınniń Qazaqstan Respýblıkasyna resmı sapary aıasynda qabyldandy.
«Silk Way Star» — Ortalyq Azııa elderi, Kavkaz jáne Qytaı ánshileri qatysatyn alǵashqy birlesken mýzykalyq joba. Joba aıasynda baıqaýlyq óner kórsetýler, shoý baǵdarlamalar men gala-kontsert josparlanǵan. Ár túrli tilde shyrqalatyn ánder men jarqyn mádenı-mýzykalyq kollaboratsııalar mádenıetter arasyndaǵy erekshe shyǵarmashylyq dıalogti qalyptastyrmaq.
— Bul - eshqandaı franshıza emes, qazaqstandyq mamandardyń oılap tapqan jobasy. Ózderińiz bilesizder, elimizde kóptegen telearnalarda kórsetiletin iri mýzykalyq halyqaralyq shoýlar — shet elderdiń franshıza ónimderi. Bul baıqaýǵa 12 elden qatysýshylar keledi. Bıyl maýsym aıynda QR Prezıdentiniń Teleradıokesheni men Qytaı Medıa korporatsııasy (CMG) «Silk Way Star» halyqaralyq jobasy týraly kelisimge qol qoıǵan bolatyn. Sol kelisimge oraı, jobany kúzgi maýsymǵa daıyndap jatyrmyz, — dedi «Jibek Joly/Silk Way» telearnasynyń basqarýshy dırektory Erkejan Kúntýǵan.
Baıqaýǵa 12 el, atap aıtqanda Armenııa, Ázerbaıjan, Grýzııa, Qazaqstan, Qyrǵyzstan, Qytaı, Malaızııa, Mońǵolııa, Ońtústik Koreıa, Ózbekstan, Tájikstan jáne Túrikmenstan ókilderi qatysady. Qatysýshylar qatarynda tanymal ártistermen qatar, jańa esimder de bar. Al bizdiń eldiń namysyn talantty ánshi, Alem laqap atymen tanylǵan Batyrhan Málikov qorǵaıdy.
— Bul - zor jaýapkershilik. Men jalpy baıqaýlarǵa qatyspaǵaly kóp boldy jáne sahnada toppen óner kórsetip júrgennen keıin baıqaýǵa qatysýdy da umytyp qalyppyn. Sondyqtan da usynys túskende, árıne, qanshalyqty bul jobada ózimdi kórsete alamyn dep kóp oılandym. Biraq qýana-qýana qabyl aldym, óıtkeni bul - men úshin kók Týymyzdy álemdik arenada jelbiretetin bıik mártebe. Osy múmkindik úshin kóp-kóp rahmet! Men barymdy salyp, jeńiske jetýge tyrysamyn, — dedi jas ánshi.
Mýzykalyq saıys túsirilimi 2025 jylǵy 20 tamyzda bastalady. Grand-fınal 22 qarasha kúni Jibek Joly/Silk Way telearnalarynda jáne baıqaýǵa qatysýshy elderdiń jetekshi telearnalarynda tikeleı efırde kórsetiledi.
Jeńimpazǵa SILK WAY STAR erekshe ataǵy berilip, ónerin jahandyq sahnada tanytý múmkindigi usynylady.
Kelesi jyly Silk Way Star baıqaýy Qytaıda ótedi. Al odan keıingi jyldary bul baıqaýdy ótkizýge ózge de Azııa elderi usynys jasasa, olarǵa baıqaýdy ótkizý múmkindigi berilmek.
Sonymen qatar Jibek Joly/Silk Way jańa maýsymda realıtı-shoýlar, saraptamalyq salmaqty baǵdarlamalar men eńbek adamdary jaıly biregeı jobalar usynady.